Shekarashylar men keden qyzmetkerleri aǵylshyn tilin bilýleri kerek - Á.Isekeshov
TANA. 3 qazan. QazAqparat /Aıdar Ospanalıev/ - Shet memleketten kelýshiler keden qyzmetkerleri men shekarashylardyń is-áreketterine narazy bolyp otyr. Bul máseleni búgin selektorlyq rejımde ótken Úkimet otyrysynda Úkimet basshysynyń orynbasary, Indýstrııa jáne jańa tehnologııalar mınıstri Áset Isekeshov kóterdi.
Onyń aıtýynsha, ınvestorlardyń qandaı da bir memleketke ınvestıtsııa salý jónindegi sheshimderi sol elge alǵash kelgen kezde alatyn áserimen baılanysty. «Buny elimizge kelip jatqan ınvestorlar da aıtýda. Al elimizdiń áýejaılarynda sheteldikterge nemquraıly kózqaras tanytý jaǵdaılary kezdesip turady. Olar kóbine keden qyzmeti, shekarashylar sııaqty quzyrly organ qyzmetkerleriniń qyzmet etıkasyn qadaǵalamaý, dórekilik túrinde kórinis tabady»,-deıdi mınıstr.
Onyń sózine qaraǵanda sonymen qatar qyzmetkerlerdiń aǵylshyn tilin eń quryǵanda bazalyq negizde de bilmeýi túrli qıyndyqtarǵa ushyratady. «Osyǵan baılanysty biz keden qyzmetkerleri men shekarashylarǵa kúnde tańerteń túsindirý jumystaryn júrgizýdi usynamyz. Sondaı-aq olardyń aǵylshyn tilin bilgenderi jón. Al aǵylshyn tiline qatysty máseleni júıeli túrde sheshý úshin keden jáne shekara qyzmetterinde qyzmetkerlerdi aǵylshyn tiline úıretý baǵdarlamalary bolý kerek»,-dedi Á.Isekeshov.
