Shekarashylar Qytaıdan «Aıfon» telefondaryn zańsyz alyp kelmek bolǵandardy ustady
ASTANA. QazAqparat - Ótken táýlik ishinde Shekara qyzmetiniń «Qorǵas» baqylaý-ótkizý beketiniń baqylaýshylary kontrabandalyq jolmen 36 dana uıaly telefondardy alyp ótpek bolǵan qazaqstandyq azamattardy ustady, dep habarlady QR UQK ShQ baspasóz qyzmetinen.
Qazaq-qytaı memlekettik shekarasynyń aralyǵynda ornalasqan «Shekaralyq yntymaqtastyqtyń halyqaralyq ortalyǵynan» elimizge qaraı kele jatqan 1993 jyly týǵan Maqsat esimdi azamatty tekserý barysynda, onyń qol júginen jarııalanbaǵan 26 dana «Aıfon-6» uıaly telefony tabyldy. Kelesi oqıǵa da osy bekette oryn aldy. Shekarashylar Jazıra esimdi 1986 jyly týǵan azamatshany ustap, onyń qoljúgin shekaralyq tekserý kezinde 10 dana «Aıfon-5S» uıaly telefonyn anyqtady. Atalǵan derekter boıynsha materıaldar «Altynkol» keden beketiniń qyzmetkerlerine berildi.
