Shekarashylar Qazaqstan aýmaǵynan Qyrǵyzstanǵa munaı ónimderin aıdaýǵa arnalǵan tútikti tapty
ASTANA. QazAqparat - Qyrǵyz shekarashylary Qazaqstannan munaı ónimderin aıdaýǵa arnalǵan tútikti tapqan. Bul týraly beısenbi kúni Qyrǵyz Respýblıkasynyń memlekettik shekara qyzmeti qoǵammen baılanys jáne BAQ-pen jumys bólimi málim etti, dep habarlaıdy KırTAG.
«2017 jyldyń 26 qańtar kúni Shý oblysy Issyk-Atın aýdany Ken-Býlýn eldi mekeniniń mańynda shekarashylar Qazaqstannan Qyrǵyzstanǵa Shý ózeniniń túbinen munaı ónimderin tútik arqyly aıdaýmen shuǵyldanǵan Qyrǵyzstan azamatyn ustady», - delingen habarlamada.
DAF markaly kontrabandashylardyń júk mashınasy jalpy syıymdylyǵy 30 tonna bolatyn tórtburyshty tsısternalarmen jabdyqtalǵan. Eki qyrǵyzstandyq azamat Qyrǵyzstan aýmaǵynda bolǵan, al munaıdy Qazaqstan jaǵynan aıdaǵan. Olardy ustaǵan ýaqytta tsısternada 15 tonna dızeldik janarmaı bolǵan.
