Shekarashylar Kaspıı teńizinde zańsyz balyq aýlaǵan 4 Ázerbaıjan azamatyn ustady

AQTAÝ. QazAqparat – Mańǵystaý oblysynda shekarashylar Kaspıı teńiziniń sý aıdynynda zańsyz balyq aýlap júrgen Ázerbaıjan Respýblıkasynyń 4 azamatyn ustady, dep habarlaıdy QazAqparat QR Ulttyq qaýipsizdik komıtetiniń baspasóz qyzmetine silteme jasap.

QR UQK Shekara qyzmetiniń Mańǵystaý oblysy boıynsha departamenti 2020 jylǵy 11 sáýirde balyqtardy qorǵaýdyń «Bekire» keń kólemdi aktsııasy sheńberinde

Kaspıı teńiziniń sý aıdynynda zańsyz balyq aýlap júrgen Ázerbaıjan Respýblıkasynyń 4 azamatyn ustady.

Tekserý is-qımyldary barysynda ustalǵan tulǵalardan balyq aýlaýǵa arnalǵan qural-jabdyqtar, sondaı-aq F-1 qol granatasy tárkilendi.

Kórsetilgen tulǵalarǵa qatysty Qazaqstan Respýblıkasy Qylmystyq kodeksiniń «qarý-jaraqtardy, oq-dárilerdi, jarylǵysh zattary men jarǵysh quraldaryn zańsyz alý, berý, qolǵa túsirý, saqtaý, tasymaldaý nemese alyp júrý» 3-bóligi 287-baby jáne «Qazaqstan Respýblıkasynyń Memlekettik shekarasyn qasaqana zańsyz buzý» 392-baby boıynsha qylmystyq is qozǵaldy.
Tergeý is-sharalary júrgizilýde, dep habarlady QR Ulttyq qaýipsizdik komıtetiniń baspasóz qyzmeti Facebook -te.