Shekarashylar ıesiz jatqan 10 tonna ishimdik tapty
ASTANA. QazAqparat - Shekarashylar Qyzylorda men Ońtústik Qazaqstan oblystarynyń Ózbekstanmen shekaralas aımaqtarynda ıesiz jatqan 10 tonna spırt ónimderin anyqtady, dep habarlaıdy UQK ShQ baspasóz qyzmetinen.
Atap aıtqanda, «Qyzylqum» shekara zastavasynyń narıady Ózbekstan aýmaǵyndaǵy shekara belgisiniń mańaıynan «ÝAZ» markaly eki mashınanyń júrgendigin baıqaǵan. Shekarashylardy kórisimen olar kórshi eldiń aýmaǵyna qaraı jasyryndy. Qazaqstan jaǵyndaǵy aýmaqty qaraý barysynda 1,5 lıtrlik qutylarǵa quıylyp, 240 qapshyqqa salynǵan spırt ónimderi tabyldy. Anyqtalǵan ónimniń jalpy salmaǵy 9 tonnaǵa jetti.
Buǵan qosa, «Orynbaı» zastavasynyń shekarashylary da taǵy bir spırt qoımasyn tapty. Ol jerden bir tonnaǵa jýyq spırt ónimi alyndy.
«Iesiz júkti jatqan jerinde shekara narıady kúzetip shyqty. Júrgizilgen is-sharalar nátıjesinde júktiń ıesi anyqtalyp, ony qazaq-ózbek shekarasyna deıin jetkizýge kómekteskenderdiń esimderi de belgili boldy. Protsessýaldyq talaptardy saqtaý maqsatynda jáne tıisti sheshim qabyldaý úshin atalǵan júkter zattaı aıǵaq retinde quqyqqorǵaý organdaryna berildi» delingen bapasóz habarlamasynda.
