Shekarashylar esirtki tasyǵan eki adamdy ustady
ASTANA. QazAqparat - Shekarashylar esirtki tasyǵan eki adamdy ustady, dep habarlaıdy QazAqparat QR UQK ShQ baspasóz qyzmetine silteme jasap.
Semeılik shekarashylar «Aýyl-temirjol» ótkizý bólimshesinde «Almaty-Novosibir» baǵytyndaǵy № 302 poıyzdyń jolaýshysyn ustady. «Vagondardyń birin tekserý kezinde shekarashylardyń «Gretta» atty qyzmettik ıti ústelderdiń biriniń ústinde, tyǵyny jabyq turǵan aırannyń qutysyn meńzedi. Aırannyń ıesi, 58 jastaǵy qazaqstandyq, muqııat jabylǵan plastık bótelkeden ıisi syrtqa shyǵa qoımas degen senimmen, salmaǵy 20 gramdaı bolatyn marıhýana esirtkisin soǵan salyp, ústelge qoıǵan», - delingen habarlamada.
Qýlyǵy iske aspaı qalǵan azamat Semeı jelilik ishki ister bólimine tapsyryldy.
Qordaı shekara otrıadynyń «Qordaı-avto» bólimshesinde ótken túnde Shekarashylarǵa tólqujatyn teksertip bolyp, bizdiń elge kirip kele jatqan 38 jastaǵy qyrǵyzstandyq ustaldy.
«Esik aldyndaǵy shekarashylardyń kózderin ala berip, ol qaltasynan alyp shyqqan túıinshegin edenge eleýsiz tastaı salǵan bolatyn. Biraq bul jáıt shekarashylardyń kózinen tys qalmady. Iisshil ıt túıinshektiń ıesin birden taýyp berdi. Onyń ishinde 3 gramdaı gashısh esirtkisi bar bolǵan», delingen habarlamada.
Ustalǵan azamat Qordaı aýdandyq ishki ister bólimine tapsyryldy.
