Shekarashylar brakonerlerdiń qolyna túsken bekire balyqtaryn bosatty
ASTANA. QazAqparat - Shekara qyzmetiniń «Jaǵalaý kúzeti» aımaqtyq basqarmasynyń shekarashylary zańsyz qurylǵan brakonerlik balyq aýlaý quraldary (kolladalar) men bekire tuqymdas balyqtary bar qarmaqtardy anyqtady. Bul týraly QR UQK ShQ-nyń baspasóz qyzmeti habarlady.
Vedomstvonyń málimetinshe, «Sardar» shekaralyq kemesi Kaspıı teńiziniń qazaqstandyq bóligindegi bıoresýrstardy saqtap, sol arqyly elimizdiń ekonomıkalyq múddesin qorǵaý maqsatynda atqarylatyn kezekshilik kezinde uzyndyǵy 7000 metr bolatyn ıesiz jatqan brakonerlik balyq aýlaý quraldaryn (kolladalar) taýypty. Ondaǵy 3500 qarmaqqa týlaǵan bekire tuqymdas balyqtary tutylyp qalypty, barlyǵy 71 dana bolatyn balyqtardyń jalpy salmaǵy bir jarym tsentnerge (150 keli) jetti.
Aǵa leıtenant Azamat Qunapııanovtyń basshylyǵymen qımyldaǵan ekıpaj balyqtardy bosatyp, teńizge jiberdi. Osy oqıǵaǵa baılanysty quqyq qorǵaý organdaryna habar berildi.
