Shekarashylar BQO-da elimizdiń aýmaǵynan munaı ónimderin zańsyz shyǵarý áreketiniń aldyn aldy

ASTANA. QazAqparat - 2022 jylǵy 8-11 qazan aralyǵynda Ulttyq qaýipsizdik komıtetiniń Shekara qyzmeti Batys Qazaqstan oblysynyń «Jaıyq» temir jol ótkizý pýnktinde elimizdiń aýmaǵynan munaı ónimderin zańsyz shyǵarýdyń aldyn aldy.

Bul týraly QazAqparat QR Ulttyq qaýipsizdik komıtetiniń baspasóz qyzmetine silteme jasap habarlaıdy.

Jaǵarmaı tıelgen 20 temirjol tsısternasy bıtýmdyq laktardy eritkish «Ýaıt-spırıt» retinde kórsetilip, júkke arnalǵan temirjol quramdarymen tasymaldanǵan.

Ustalǵan júk quzyreti boıynsha protsessýaldyq sheshim shyǵarý úshin Batys Qazaqstan oblysy boıynsha Memlekettik kirister departamentine berildi.

«Shekara qyzmeti Qazaqstandaǵy benzın, dızel otyny men munaı ónimderiniń jeke túrleriniń shyǵarylýyna ýaqytsha shekteýler qoıylǵanyn eske salady»,-delingen UQK baspasóz qyzmeti taratqan aqparatta.