Shekarashylar bir táýlikte birneshe qylmystyń jolyn kesti
ASTANA. QazAqparat - Qazaqstan shekarashylary ótken táýlik ishinde zańsyz jolmen taýar ótkizbek bolǵan birneshe azamattyń jolyn kesti, dep habarlaıdy QR UQK ShQ baspasóz qyzmeti.
Elimizdiń shyǵysyndaǵy «Qorǵas» baqylaý-ótkizý beketiniń narıady temeki ónimderin zańsyz ótkizýge tyrysqan 22 jastaǵy Qazaqstan azamatyn ustady. Temeki ónimderiniń jalpy sany 3 400 qorap bolyp shyqty. Atalǵan istiń materıaldary QR Qylmystyq kodeksiniń 234-babynyń 1-tarmaǵy boıynsha Almaty oblysynyń Panfılov aýdandyq prokýratýrasyna berildi. Osy kúni elimizdiń ońtústigindegi «Sypataı batyr avto» beketinde 58 jastaǵy Qyrǵyzstan azamaty ustaldy. Qazaqstannan kórshiles Qyrǵyzstanǵa ketip bara jatqan azamattyń zańsyz túrde ótkizbek bolǵan júgi 60 keli dári-dármek bolyp shyqty. Atalǵan derek boıynsha quqyq qorǵaý organdary habarlandyryldy. Sondaı-aq, Qazaq-reseı shekarasyndaǵy «Qurmanǵazy avto» baqylaý-ótkizý beketiniń shekara narıady 11 bas múıizdi iri qarany shekaradan zańsyz ótkizýge árekettengen reseılik eki azamatty ustady. Eki júk kóligine tıegen iri qaralardyń qujattary durys bolmaı shyqty. Kórsetken qujattarynyń merzimi ótip ketkenimen qoımaı, onyń biraz jeri qolmen túzetilgendigi anyqtaldy. Atalǵan derek boıynsha materıaldar Atyraý oblysynyń Qurmanǵazy aýdandyq ishki ister bólimine berildi.
