Shekarashylar bir táýlik ishinde zańsyz júrgen 111 Ózbekstan azamatyn ustady
ASTANA. QazAqparat - Elimizdegi zańsyz mıgratsııaǵa tosqaýyl qoıý maqsatynda júrgizilip jatqan «Nelegal-2015» arnaıy is-sharasyna Qyzylorda, Saryaǵash, Jetisaı otrıadtarynyń jáne «Leńger» komendatýrasynyń shekarashylary belsendi qatysýda, dep habarlaıdy QR UQK ShQ baspasóz qyzmetinen.
Ótken táýlik ishinde Saryaǵash shekara otrıadyna qarasty «Kaplanbek» kóliktik baqylaý-ótkizý beketiniń shekarashylary elimizdiń kóshi-qon zańdylyǵyn buzǵan 39 adamdy ustady. Ustalǵandardyń barlyǵy elmizde 30 táýlik boıy zańsyz júrgen. Ózbekstan azamaty bolyp tabylatyn adamdar QR Ákimshilik-quqyqbuzýshylyq kodeksiniń 517-babynyń 2,4-tarmaqshalary boıynsha ákimshilik jaýapkershilikke tartyldy.
Jetisaı shekara otrıadyna qarasty «Syrdarııa» zastavasynyń shekarashylary reıd barysynda Bestam aýylynyń mańaıynan Ózbekstan Respýblıkasynyń 31 azamatyn ustady. Teksere kelgende olardyń jeke basyn kýálandyratyn qujattarynyń, shekara aımaǵynda júrýge arnalǵan ruqsattamalarynyń joq ekendigi anyqtaldy. Atalǵan derek boıynsha materıaldar OQO Maqtaaral aýdandyq ishki ister bóliminiń qyzmetkerlerine berildi.
Jalpy, ótken táýlik ishinde shekara boıyndaǵy aımaqtan 111 adam ustaldy. Olardyń barlyǵy da Ózbekstan azamaty.
Al «Nelegal-2015» is-sharasy bastalǵaly beri joǵaryda atalǵan shekara otrıadtarynyń shekarashylary elimizdiń kóshi-qon zańdylyǵyn buzǵan 1902 adamdy ustady, olardyń 1898-i Ózbekstan azamattary.
