Shekarashylar bir kólikti neshe mınýt teksere alady
ASTANA. QazAqparat – Qazaqstan shekarasynyń 84 paıyzy eshqandaı tehnıkalyq jabdyqsyz, áskermen ǵana kúzetiledi. Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov Senat kýlýarynda osyndaı málimet keltirdi, dep habarlaıdy QazAqparat tilshisi.
«Normatıv boıynsha kez kelgen kólik ótkizý beketinde adamdy tekserýdiń reglamenti 3 mınýtke deıin dep belgilengen. Jeńil avtokólikke 15 mınýtke deıin, júk kóligine 30 mınýtke deıin jáne avtobýstarǵa jolaýshynyń kóptigin eskerip, 45 mınýtke deıin reglament kózdelgen», - dedi Erlan Aldajumanov.
Shekara qyzmetiniń dırektory bul reglament shekara qyzmetine ǵana qatysty ekenin eskertti.
«Normatıv barynsha qysqartylǵan dep aıtýǵa bolady. Zańnamany buzbaý úshin bir adamdy tekserýge shashamen 1 mınýt ketedi. Óıtkeni adamnyń tólqujat derekteri tekseriledi. Mundaı normatıvti oryndaý múmkin bolyp otyr deýge keledi», - dedi UQK ókili.
