Shekarashy sýǵa batqan júkti áıel men onyń 5 jasar balasyn qutqaryp qaldy
NUR-SULTAN. QazAqparat - Shekarashy sýǵa batyp bara jatqan júkti áıel men onyń 5 jasar balasyn qutqaryp qaldy, dep habarlaıdy QazAqparat Ulttyq qaýipsizdik komıtetiniń shekara qyzmetine silteme jasap.
Petropavl shekara jasaǵyna qarasty «Bıdaıyq» ótkizý bólimshesiniń áskerı qyzmetshisi Sergeı Gaıdaı demalý úshin Sh. Ýálıhanov aýdanynyń Bıdaıyq aýylyndaǵy kól jaǵasyna barady.
«Shekarashy avtokóligindegi tósenishti alyp shyǵyp, qaǵyp-silkip jatqanda kópir jaqtan balanyń aşy aıǵaıyn qulaǵy shalady. Jalt qaraǵan ol kópirde ersili-qarsyly júgirip júrgen eki kishkentaı qyzdy kóredi. Al kópir astynda áıel adam sýdan bir batyp, bir shyǵyp jantalasyp júr eken. Sergeı oılanbastan sýǵa qoıyp ketti. Júzip janyna barǵanda áıel kishkentaı balasynyń sýǵa batyp ketkenin aıtady. Sergeı sý astyna súńgip, kóldiń tabanyn qolymen sıpalap júrip balany tabady da, kıiminen tartyp, sý betine alyp shyǵady. Ana men balany jaǵaǵa jetkizgen Sergeı es-tússiz jatqan 5 jasar Nurádilge alǵashqy medıtsınalyq kómek kórsetti. Sodan keıin ǵana bala esin jıdy» delingen habarlamada.
Keıin belgili bolǵandaı, ol eki adamnyń emes, úsh adamnyń ómirin qutqarǵan. Sebebi, qutqarylǵan áıel Mahabbat Jetpisovanyń aıaǵy aýyr bolyp shyqty. Sergeı ana men balany avtokóligine otyrǵyzyp, medıtsınalyq beketke alyp barǵan.
