Shekarashy ónertapqyshtyǵy úshin merziminen buryn «maıor» shenin aldy
ASTANA. QazAqparat - Shekarashylar kúni qarsańynda «Darhan» zastavasynyń bastyǵy kapıtan Farhad Kakımov QR UQK tóraǵasynyń orynbasary - Shekara qyzmeti dırektorynyń qolynan merziminen buryn «maıor» shenin aldy, dep habarlaıdy QR UQK ShQ baspasóz qyzmeti.
Áskerı ataq oǵan úzdik qyzmeti úshin ǵana emes, sonymen birge ónertapqyshtyǵy úshin de berilip otyrǵandyǵyn atap ótý kerek. D. Kakımov shekara otrıadynyń aýmaǵynda qoldan jasalǵan dabyldatqysh qurylǵy oılap tapqan.
«Sońǵy jyldary memlekettik shekarany qorǵaýdyń sapasyn arttyrý úshin birneshe mańyzdy sheshimder qabyldandy. Búgingi tańda shekara buzýshylardy ustaýǵa qazirgi zamanǵa saı ornatylǵan tehnıkalar kóp kómegin tıgizip júr. Sonymen qatar shekarashylardyń ózderi de ónertapqyshtyq kórsetetin sátter kezdesedi. Olardiki de ǵalymdardyń oılap tapqandarynan kem túspeıdi. Saryaǵash shekara otrıadynyń aýmaǵynda qoldan jasalǵan dabyldatqysh qurylǵynyń kómeginiń arqasynda shekara buzýshy ustaldy. Qurylǵynyń qyzmetimen tanysý úshin biz «Darhan» zastavasynyń bastyǵy kapıtan Farhad Kakımovqa jolyqtyq. Onyń ónertapqyshtyǵy tańqaldyrdy. Munda eshqandaı da mıkrochıpter joq, barlyǵy da qarapaıym ǵana jasalǵan. Bar-joǵy eki qazyq qaǵylyp, ortasyna jip kerilgen, oǵan velosıpedtiń qońyraýy ornatylǵan», - delingen habarlamada.
«Bul qurylǵyny biz negizinen keshke qaraı nemese túk kórinbeıtin kezderde, onda da osy jerden ótýi múmkin-aý degen aımaqqa ornatamyz. Іz kesý jolaǵynan ótken shekara buzýshy osy jipti aıaǵy ilip ketedi de, qońyraý oınap shyǵa keledi», - deıdi ónertapqyshtyń ózi ony tanystyra otyryp. - Osynyń arqasynda biz 4 birdeı shekara buzýshyny ustadyq».
Osylaısha bul mańnan shekara buzýshylar da azaıa túsýde. Kapıtan Kakımov shekara qyzmetiniń ómirimen kishkentaı kezinen bastap tanys. Óıtkeni ol Shyǵys Qazaqstan oblysynyń shekara túbindegi Maqanshy aýlynda týylǵan. Shuǵyl qyzmetti Úsharal shekara otrıadynda atqardy, odan keıin ómirin shekara qyzmetimen baılanystyrýdy oılap, QR UQK Áskerı ınstıtýtyna tústi. Joǵary oqý ornyn bitirgen soń Taraz shekara otrıadynyń desantty-shabýyldaýshy zastavasynda qyzmet etti. Qyzmet barysynda «Jas orken», «Sypataı batyr», «Qaırat» zastavalarynda qyzmet atqardy. Al 2014 jyly «Darhan» zastavasynyń bastyǵy bolyp taǵaıyndaldy. Otrıad basshylyǵynyń aıtýynsha atalǵan zastavanyń aýmaǵy eń kúrdeli ýchastoktardyń biri bolyp sanalady. Sondyqtan da, bul zastavaǵa eń tájirıbeli, jaýapkershiligi joǵary ofıtserler taǵaıyndalady eken. Atalǵan ofıtserdiń qyraǵylyǵynyń arqasynda 2015 jyly shekara rejımin buzǵan 40 adam, sondaı-aq memlekettik shekarany buzǵan 3 adam ustaldy. Bıylǵy jyldyń basynan beri qaraı shekara rejımin buzǵan 9 adam ustaldy. Ustalǵandardyń kópshiligi - qujattary durys emes kórshi elden kele jatqan mıgranttar.
«Bir joly nardıaqa túsken kezde, tún qarańǵylyǵynan eshteńe kórinbeı turdy, - deıdi keıipkerimiz óziniń oılap tapqan qurylǵysyna qarap turyp. - Turǵan ornymnan ketip qalaıyn desem, áldekim ótip ketetindeı sezindim, bireý meniń ketip qalýymdy kútip turǵandaı boldy. Sondyqtan, sál uzap baryp, álgi jerge qaıta oralyp otyrdym. Bir kezde basyma osyndaı qurylǵy oılap tabý týraly ıdeıa keldi. Qurylǵy synaqtan jaqsy ótip, basshylyq ony ornatýǵa ruqsat berdi. Ony jasaýǵa úlken shyǵyn da ketpeıdi. Ári yqsham, ári jınaqy. Muny basqa zastavadaǵylar da qoldanýda, jemisin kórýde. Shekarashylardyń ónertapqyshtyǵy munymen shektelmeıdi. Túnge qaraı qolyna fonar ustaǵan adam beınesindegi qaraýyl ornatý da osy jigitterdiń oılap tapqandary. Ony bir ret túrtip qalsań bolǵany, ol adam sııaqty qozǵalyp tura beredi. Shekara buzýshylardyń úreıin ushyrýǵa jetip jatyr. Alǵy shepti kúzetý jumystary osylaısha kúnnen-kúnge damý ústinde. Teplovızorlar, kameralar, radarlar, túnde kórý quraldary - barlyǵy da shekara kúzetýde taptyrmas kómekshiler. Osyndaı kómekshiler bar kezde shekara kúzetý isinde aıtarlyqtaı tabysqa da qol jetkizýge bolady», - deıdi ol.
