Shekarashylar elden quny 14 mln teńgeden asatyn janar-jaǵarmaı shyǵarmaq bolǵandardyń jolyn kesti

ASTANA. KAZINFORM - Shekara qyzmeti 2025 jylǵy qazan aıyndaǵy is-qımyl nátıjelerin jarııalady, dep habarlaıdy UQK bpasóz qyzmeti .

Baspasóz qyzmetiniń málimetterine qaraǵanda, Shekara qyzmeti Memlekettik shekarany kúzetý men qorǵaýdy qamtamasyz etý aıasynda 2025 jylǵy qazanda quzyrly organdarmen ózara árekettese otyryp:

Shekara keńistiginde 4 743 Qazaqstan Respýblıkasynyń zańnamalaryn buzýshylardy ustady, onyń 4 077-si shetel azamattary.

Memlekettik shekara arqyly taýarlar men júkterdi zańsyz ótkizýdiń 1 708 faktisiniń aldy alyndy, sonyń ishinde:

75 – qarýlar men oq-dáriler (2 dana jaýyngerlik, 3 dana jaraqat, 258 dana sýyq qarý, 13 dana oqtaýǵa jaramsyz «AK-74» avtomattary, 36 dana oq-dáriler jáne 2800 dana atys qarýynyń jınaqtaýyshtary);

531 – jalpy somasy 14 mln teńgeden asatyn janar-jaǵarmaı materıaldary;

867 – jalpy somasy 4,2 mlrd teńgeden astam halyq tutynatyn taýarlar;

235 – jalpy somasy 2,5 mlrd teńgeden astam shetel valıýtasy.

Kaspıı akvatorııasynda 106 brakonerlik faktileriniń aldy alyndy, sondaı-aq:

24 dana júzý quraldary;

jalpy uzyndyǵy 136 km asa tordy quraıtyn brakonerlik aýlaý quraldary;

496 dana (shamamen 2 900 kg) bekire balyqtarynyń túrleri;

4 qyzyl kitap ıtbalyqtary;

Aldy alynǵan zalal somasy shamamen 1,1 mlrd teńgeni quraıdy.

Bul faktiler boıynsha materıaldar is júrgizýshilik sheshim qabyldaý úshin quqyq qorǵaý jáne sot organdaryna jiberildi.

Memlekettik shekarada qandaı da bir shekteý sharalary engizilgen joq.

-Sonymen qatar, «Syrym», «Álimbet» jáne «Qosaq» ótkizý pýnktterinde qaıta qurý boıynsha jumystar júrgizilýde, bul shekaradan ótý kezinde kútý ýaqytyn uzartýy múmkin. Osy mán-jaılardy eskerip, qozǵalys marshrýtyn aldyn ala túzetýdi suraımyz. Basqa pýnktter turaqty rejımde jumys isteıdi, -delingen UQK baspasóz qyzmeti taratqan aqparatta.

Osyǵan deıin elimizdiń qaı aımaqtarynda shekaradan zańsyz ótetinder kóp ekeni týraly jazdyq.