Shekarany buzǵan ekonomıkalyq kontrabandashylar ustaldy
ASTANA. 18 qyrkúıek. QazAqparat - QR UQK Shekara qyzmetiniń «Ońtústik» óńirlik basqarmasy Qordaı shekara otrıadyna qarasty «Jasyltóbe» shekara zastavasynyń shekarashylary shekarany buzǵan 1987 jyly týǵan Azamat esimdi Qyrǵyzstan azamatyn ustady.
Bul týraly QR UQK ShQ baspasóz qyzmetinen habarlady.
Shekarashylardyń qyraǵylyǵy arqasynda atalǵan azamat eki eldiń memlekettik shekarasynan 200 kelige jýyq qus etin ózi qalaǵan jerden alyp ótpek boldy. Oǵan kómek kórsetip jatqan ekinshi azamat shekarashylardy kórisimen atqa minip, kózden ǵaıyp boldy.
Atalǵan derek týraly quqyqqorǵaý organdary habarlandyryldy.
Osy kúni Taraz shekara otrıadyna qarasty «Sypataı batyr» shekara zastavasynyń shekarashylary 18 jastaǵy Qazaqstan azamatyn ustady. Jas jigit shekara sharbaqtaryn buzyp, qyrǵyz jerinen úsh jylqyny kirgizýge tyrysty.
Tergeý amaldary júrgizilýde.
