Shekarany zańsyz jaıaý kesip ótken sheteldik Aqtóbede ustaldy
AQTÓBE. KAZINFORM – Ol elge ońtústik óńirler arqyly kirgen. Polıtsııa qylmystyq is qozǵap, qamaýǵa aldy.
«Zańsyz kelýshi» jedel-aldyn alý is-sharasy kezinde sheteldik azamat ustaldy. Ol buǵan deıin de kóshi-qon zańnamasyn buzyp, Batys Qazaqstan oblysynyń sot sheshimimen elden shyǵarylǵan bolatyn. Soǵan qaramastan shekarany taǵy kesip ótken.
- Ol memlekettik shekarany elimizdiń ońtústik oblystarynyń birinen jaıaý kesip ótken. Júrgizgen jedel is-sharalar barysynda zańsyz kelýshiniń Aqtóbe oblysy aýmaǵynda júrgeni anyqtaldy. 38 jastaǵy quqyq buzýshy búginde qamaýǵa alyndy. Qylmystyq kodekstiń «QR memlekettik shekarasyn qasaqana zańsyz kesip ótý» baby boıynsha is qozǵaldy. Tergep-tekserý júrip jatyr,- dedi Aqtóbe oblystyq PD baspasóz qyzmeti.
Qazirgi kezde «Zańsyz kelýshi» jedel-profılaktıkalyq is-sharasy ótip jatyr. Alǵashqy kúnin kóshi-qon zańnamasyn buzǵan 70 sheteldikákimshilik jaýapqa tartyldy.
UQK baspasóz qyzmeti buǵan deıin shekarada 6,9 mlrd teńgeniń deklaratsııalanbaǵan valıýtasyn alyp ótpek bolǵandardy toqtatqanyn habarlady.
