Shekaramańy óńirlerde jerdi zańsyz berý faktileri anyqtaldy

ASTANA. KAZINFORM – Shekaramańy óńirlerde jer ýchaskelerin zań talaptaryn buza otyryp berý faktileri anyqtaldy. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Birqatar shekaramańy óńirinde jer ýchaskelerin zańnama talaptaryn, onyń ishinde 100 metrlik shekara beldeýi shegin buza otyryp berý jáne paıdalaný faktileri anyqtaldy. Olardy quqyq ıelenýshilerdiń erikti túrde bas tartýyn, jaldaý kelisimsharttaryn sot tártibimen daýlaý, ótemaqy tóleı otyryp satyp alý jáne májbúrlep ıelikten shyǵarýdy qosa alǵanda memleket menshigine qaıtarý sharalary qabyldanyp jatyr. Eń aýqymdy zań buzýshylyqtar Shyǵys Qazaqstan, Túrkistan, Almaty, Abaı jáne Jetisý oblystarynda anyqtaldy, - Úkimet basshysy.

Premer-mınıstrdiń dereginshe, keıbir óńirde zań buzýshylyqtar joıylsa, endi birinde jerge ornalastyrý jobalaryn rásimdeý, sot rásimderin júrgizý jáne ótemaqyny qarjylandyrý máselelerin sheshý kezeńinde jumys jalǵasyp jatyr. 

- Jambyl oblysynda jer ýchaskelerin ótemaqy tóleı otyryp, satyp alý júzege asyrylýda. Al Túrkistan oblysynda keıinnen májbúrlep ıelikten shyǵarý úshin jerge ornalastyrý jobalary daıyndaldy. Almaty oblysynda ýchaskelerdiń bir bóligi qaıtarylyp, qalǵandary boıynsha qaıtarý rásimderi júrgizilýde, - dedi Oljas Bektenov.

Buǵan deıin Balqash jaǵalaýyndaǵy jer ýchaskesi memleketke qaıtarylǵanyn jazǵan edik.