Shekaralyq ótkizý pýnktterinde kólik qozǵalysynyń búkil tsıkli avtomattandyrylady – Jaıdar Іńkárbaev
«Kedendik ınfraqurylymdardy, atap aıtqanda, josparlanǵan 10 ótkizý pýnktin jańǵyrtý kólik qozǵalysyn 2-den 6 jolaqqa deıin keńeıtedi. Táýligine ótkizý qabileti 8 ese artady. Shekaradan ótý ýaqyty 30 mınýtqa deıin qysqarady. Kólik quraldarynyń toqtaýsyz qozǵalysy úshin tehnıkalyq baqylaýdyń biryńǵaı tolassyz avtomattandyrylǵan dálizderin paıdalaný esebinen kólik quraly qozǵalysynyń búkil tsıkli avtomattandyrylatyn bolady», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe,búgingi kúni naqty ýaqyt rejıminde marshrýtty qadaǵalaý úshin navıgatsııalyq plombalar qoldanylýda. Elektrondy kezek júıesiniń tájirıbesi «Nur joly» ótkizý pýnktindegi kezekti aldyn ala brondaý basqa da ótkizý pýnkterine qoldanylady. Osy is-sharalardyń nátıjesinde jalǵan tranzıt úlesin 2019 jylǵy 28 paıyzdan bıyl 1,3 paıyzǵa deıin tómendetýge qol jetkizildi.
«Osy jyldyń basynan bastap jalǵan alýshylardyń mekenjaıyna taýarlardy ákelýdiń barlyǵy 177 faktisi anyqtaldy. Ótken jyldary osyndaı 11 myń fakt anyqtalǵan bolatyn. Qabyldanyp jatqan is-sharalar osy jyly EAEO ımporttalatyn taýarlar boıynsha QQS túsimderiniń ósý qarqynyn ótken jylmen salystyrǵanda 136 paıyzǵa nemese 149 mlrd teńgege artyq qamtamasyz etti»,- dedi Jaıdar Іńkárbaev.