Kambodja men Taıland Malaızııa bastamasymen bitimge kelýi múmkin
ASTANA. KAZINFORM — Kambodja premer-mınıstri Hýn Manet óz eli men Taıland arasyndaǵy shekaralyq qaqtyǵystan keıin Malaızııa premer-mınıstri Enver Ibragım usynǵan bitim usynysyn qabyldaǵandaryn málimdedi, dep habarlaıdy Anadoly.
Ol Facebook áleýmettik jelisindegi jazbasynda Taılandpen shekaradaǵy qaqtyǵystan keıin Envermen telefon arqyly sóıleskenin habarlady.
Premer-mınıstrdiń aıtýynsha, Enver taraptardy birden bitim jarııalaýǵa shaqyrǵan jáne Kambodja bul usynysty qabyldaǵan.
Hýn Manettiń málimetinshe, Enver Taılandtyń Premer-mınıstri mindetin atqarýshy Phýmtham Vechaıachaımen de kelissózder júrgizgen jáne Taıland tarapy da bitim týraly usynysty qabyldaǵan.
Alaıda onyń aıtýynsha, Taıland tarapy Enver usynǵan bitim kelisimindegi shabýyldardy toqtatý merzimi men ýaqytyna kelispeı, keıingi ýaqytty usynǵan.
— Taıland pen Kambodja arasyndaǵy qazirgi qarýly qaqtyǵysty sheshýdiń joly — Taılandtyń bitimdi qabyldaýǵa daıyndyǵynda, — dedi Hýn Manet.
Malaızııa premer-mınıstri Enver Ibragım de Hýn Manet jáne Phýmtham Vechaıachaımen kelissózder júrgizgenin rastady. Kelissózder nátıjesinde taraptar bitimge kelýge oń nıet tanytyp, bul máseleni talqylaýǵa daıyn ekendikterin bildirgen.
Taıland pen Kambodja arasyndaǵy shekaradaǵy shıelenis
Ońtústik-Shyǵys Azııada ornalasqan Taıland pen Kambodja elderin 817 shaqyrymdyq shekara bólip jatyr. Bul elder arasynda uzaq ýaqyttan beri aýmaqtyq daý-damaı bar.
28 mamyrda Taıland pen Kambodja arasyndaǵy shekaralyq kelisimdi buzý saldarynan óńirde qysqa merzimdi qaqtyǵys bolyp, eki eldiń áskerıleri qaqtyǵysty beıbit jolmen sheshýge ýaǵdalasqan.
Taıland Kambodjamen shekaradaǵy barlyq ótkizý beketteri Bangkok úkimetiniń baqylaýyna alynatynyn jarııalaǵan bolatyn.
Arada shamamen eki aı ótken soń, jańa shekaralyq qaqtyǵystan keıin Kambodjada 1 adam, Taılandta 14 adam qaza tapty. Eki el de atalǵan aımaqtan myńdaǵan adamdy evakýatsııalaý týraly sheshim qabyldady.
Qarýly qaqtyǵystyń bastalýyna qatysty eki tarap ta birin-biri alǵash oq atty dep aıyptap otyr.
Buǵan deıin Taılandtyń Shekarany qorǵaý qolbasshylyǵy Chanthabýrı men Trat provıntsııalaryndaǵy segiz aýdanda áskerı jaǵdaı engizilgenin jarııalady.