Shekaralas aýmaqtarǵa sheteldik baılanys operatorlary zańsyz enip otyr

Búgin QR Parlamenti Májilisiniń jalpy otyrysynda QR Premer-Mınıstriniń atyna saýal joldaǵan Ersultan Bekturǵanov osy máseleni kóterdi.

Depýtatyń aıtýynsha, «Baılanys týraly» Qazaqstan Respýblıkasy Zańynyń 11-babyna sáıkes radıojıilik spektr baılanys salasyndaǵy ulttyq resýrs bolyp tabylady. Zańnamada kórsetilgendeı, mundaı resýrs shekteýli jáne ony tek aqyly negizde ǵana paıdalanýǵa bolady. Al radıojıilik spektrin negizinen qazaqstandyq zańnamaǵa sáıkes respýblıka aýmaǵynda óz qyzmetin kórsetý úshin tıisti lıtsenzııa jáne ruqsat alǵan baılanys operatorlary ǵana qoldana alady.

«Ókinishke oraı, elimizdiń shekaralas aýmaqtaryndaǵy kórshi elderdiń operatorlary qazaqstandyq baılanys operatorlary jumys isteýge tıis jıilikterde ondaǵan shaqyrymǵa kirip, Qazaqstan aýmaǵynda zańsyz jumys isteıtini anyqtalyp otyr. Sheteldik operatorlar lıtsenzııasyz, radıo elektrlik quraldardy qoldaný jónindegi qandaı da bir ruqsatsyz jumys isteýde. Olar radıojıilik spektrin qoldanǵany úshin aqy tólemeıdi, qazaqstandyq baılanys operatorlarynyń qyzmet kórsetý sapasyn tómendetip, kedergi jasaıdy», - deıdi depýtat E. Beturǵanov.

Onyń sózine qaraǵanda, elimizde 25 mıllıonnan astam uıaly abonentter bar bolsa, olardyń shekara aýmaqtarynda májbúrli túrde roýmıngke kóshýine baılanysty sheteldik operatorlarǵa ketetin shyǵyndardy esepteý qıyndyq týǵyzbaıdy.

«Shekaradaǵy mundaı jaǵdaı memleketimizge aýqymdy ekonomıkalyq zalalmen qatar aqparattyq qaýipsizdikti qamtamasyz etý jónindegi is-sharalardy, sondaı-aq radıojıilik spektrge jatatyn onyń negizgi strategııalyq resýrstaryn qorǵaýdy buzyp otyr. Tótenshe jaǵdaılarda nemese jedel-izdestirý qyzmeti sheńberinde respýblıkanyń shekaraǵa jaqyn aýmaqtarynda baılanys jelilerin basqarý múmkin bolmaıdy. Mundaı jaǵdaıǵa jol bermeý jáne bundaı zańbuzýshylyqty jedel toqtatý kerek dep esepteımiz. Máselen, Eýropalyq odaqtyń kez kelgen eliniń shekarasynan bir metr ótkennen keıin, kelesi eldiń operatory avtomatty túrde qosylady. Bundaı tájirıbeni bizde de qoldanýǵa bolady», - deıdi E. Bekturǵanov.