Shekaradan zańsyz ótýdiń jańa túrleri paıda boldy - QR UQK

NUR-SULTAN. QazAqparat - Qazaqstannyń memlekettik shekarasyn karantındik shekteýler kezinde zańsyz kesip ótýdiń jańa túrleri paıda boldy. Mundaı aqparatty QR Ulttyq qaýipsizdik komıtetiniń baspasóz qyzmeti usynyp otyr, dep habarlaıdy QazAqparat tilshisi.

Máselen, ótken aptada «Qarasý» avtomobıl ótkizý pýnktterinde memlekettik shekarany zańsyz kesip ótýdiń 8 áreketine tosqaýyl qoıyldy: Jambyl oblysy – 1 fakti, Mańǵystaý oblysy - 1 fakti, Aqtóbe oblysy – 1 fakti, SQO – 1 fakti, Qostanaı oblysy – 2 fakti, Pavlodar oblysy – 2 fakti.

«Júrgizýshiler halyqaralyq júk tasymalynyń shekaradan ótýine negiz bolatyn ekinshi júrgizýshi retinde jalǵan júrgizýshi kýálikterin qoldana otyryp, shekarany zańsyz kesip ótýge tyrysqan. Atalǵan barlyq jaǵdaıda QR Qylmystyq kodeksiniń «Jalǵan qujattardy, mórtabandardy, mórlerdi, blankilerdi, poshta tóleminiń memlekettik belgilerin, memlekettik nagradalardy qoldan jasaý, daıyndaý nemese ótkizý» týraly 385-babynda kózdelgen qylmys belgileri boıynsha tekserý materıaldary men kólik quraldary ýákiletti organdarǵa berildi«, - delingen taratylǵan aqparatta.

Sonymen qatar 18 qarashada «Qarasý» (Jambyl oblysy), «Jaısań» (Aqtóbe oblysy), «Jańa jol» jáne «Qaraqoǵa» (SQO) ótkizý pýnktterinde jalǵan qujattar men sáıkestendirý nómirleri bar avtomobılderdi shekara arqyly zańsyz ótkizýdiń 4 áreketiniń joly kesilgen.

Jalpy, karantındik shekteýler kezeńinde memlekettik shekarany zańsyz kesip ótý úshin jalǵan júrgizýshi kýálikterin paıdalanǵan 113 adam (Qazaqstan - 51, Qyrǵyzstan - 30, Ózbekstan - 20, Tájikstan - 7, RF - 5), jalǵan medıtsınalyq anyqtamalary bar 35 adam, sondaı-aq qazaqstandyq medıtsınalyq mekemelerden jalǵan shaqyrýlary bar 42 sheteldik anyqtaldy.