Shekaradan zańsyz ótý úshin adamdar túrli qýlyqqa barady – shekarashy
Arnur Ámirǵalıev Maǵjan Jumabaev aýdanyndaǵy Baıan Batyr shekara bólimshesin ótken jyldyń qazan aıynan bastap basqaryp keledi. Óz mindetine berik, sózden góri istiń adamy Arnur Nurmaǵanbetuly óńirdegi jıyrmadan astam shekara bólimshesi bastyǵynyń ishinen top jaryp, byltyr oblystyń úzdik shekara bólimshesiniń bastyǵy atandy. Aıtýynsha, ol jerde barlyq kórsetkish eskerilgen, bólimshedegi ishki tártipten bastap, shekara buzýǵa áreket jasap jatqandardy anyqtap, ustaýǵa deıin. Qol astyndaǵy qyzmetshilerdiń eshqandaı jaýapkershilikke tartylmaýy – osynyń bárinen eń joǵary ball jınaǵan bastyq úzdik atanady.
«Men Almaty oblysy Alakól aýdany Jaıpaq aýylynda dúnıege keldim. 2014 jyly týǵan aýylymdaǵy Muqan Tólebaev atyndaǵy orta mektepte bitirip, sol jyly Almaty qalasyndaǵy shekara qyzmeti Akademııasyna oqýǵa tústim, osylaısha shekarashy mamandyǵyn alyp shyqtym. Týǵan jerin súımeıtin adam joq, árkim qolynan kelgenshe Otanyna qyzmet etkisi keledi. Al men bolsam baıtaq jerimizdi, týǵan elimizdi qorǵaıtyn shekarashy bolsam dedim.
Qazybek bıdiń «Jeriniń shetin jaý baspasyn dep naızaǵa úki taqqan» degen sózi bar, shekarashy bolý úshin eń aldymen patrıot bolý qajet. Sondaı-aq shydamdylyq, qaısarlyq adam boıynda bolǵany jón. El senimin, úmitin tolyq aqtaý úshin aldyńǵy shepte keń-baıtaq elimizdiń shekarasyn kúzetip júrmiz», - deıdi Arnur Ámirǵalıev.
Baıan Batyr shekara bólimshesiniń qyzmetkerleri bıyl memlekettik shekarany buzyp ótpek bolǵan 14 adamdy qolǵa túsirdi. Olar kórshi memleketke baryp, jaqsy jumysqa ornalasýdy, qarajat tabýdy kózdegen. Endi biri týystaryna ótpek bolǵan eken.
«Reseıde bala-shaǵasy, aǵaıyn-týystary bar, solarǵa baryp-qaıtqylary keledi, biraq negizgi beketten óte almaıdy, tyıym salynǵan bolýy múmkin. Keıbiriniń qaryzy bar, endi biri qylmystyq jaýapkershilikke tartylǵan bolýy múmkin. Mine osyndaılar zańsyz ótýge áreket jasaıdy. Mysaly, bıyl qolǵa túskenderdiń beseýi – el azamaty, ekeýi – Ózbekstan azamaty. Ekeýi syǵan jáne qalǵany reseılikter. Olardy ustap, memlekettik shekara rejımin buzǵany úshin QR memlekettik shekara týraly zańynyń 514 babyna sáıkes aıyppul salamyz, eger Qazaqstan azamaty bolǵan jaǵdaıda aıyppul mólsheri – 10 aılyq eseptik kórsetkish. Sheteldik bolsa mıgratsııalyq polıtsııaǵa tapsyryp, respýblıka aýmaǵynan 10 kún ishinde shyǵarylady, elderine qaıtarylady.
Memlekettik shekarany buzýshylar ózderimen birge ákele jatqan zattaryn, temeki qaldyqtaryn, ishken sýsyndarynyń bos ydystaryn qaldyryp ketedi. Sol arqyly tabýǵa bolady. Iisshil, úıretilgen ıtterimiz bar, solardy izge salyp, alysqa uzatpaı quryqtaımyz», - deıdi shekarashy.
Otan tynyshtyǵyn kúzetý jolynda eńbek etip júrgen Arnur Nurmaǵanbetuly osy ýaqytqa deıin 30-ǵa jýyq shekara buzýshyny qolǵa túsirgen.
«Shekarany buzýshylar túrli is-áreket, aıla-tásilderge barady. Bizde shekara syzyǵy boıymen iz baqylaý jolaǵy bar. Ony shekaradan zańsyz ótýshiniń izin kórý úshin traktormen jyrtyp qoıamyz. Ótkende iz qalyp qoıady. Sol izdi joıý úshin arttarynan sypyrtqymen sypyratyndar bolady ne bolmasa jylqynyń, sıyrdyń tuıaǵyn aıaqtaryna baılap alyp, sol arqyly attap ótedi. Keıbiri taldy, taıaq tastap, izin kórsetpeý úshin sonyń ústimen ótedi. Endi biri syrǵaýyldy jerge qadap, kelesi betke sekirip ótedi.
Jalpy kúsh qurylymynda isteıtinder mindetti túrde sportqa jaqyn bolýy tıis. Óıtkeni qylmyskerlermen betpe-bet keletin kezder bolady. Qarsylyq kórsetkende ádis kórsetip, qashqan kezde qýyp jetip ustaý – jaqsy fızıkalyq daıyndyqtyń bereri kóp. Akademııada oqyp júrgende qoıan-qoltyq urystan osy oqý ornynyń 55 kg salmaqta chempıony boldym. Byltyr oblys boıynsha shekara qyzmeti departamenti bastyǵynyń Kýbogi boldy, oǵan barlyq kúsh qurylym ókilderi qatysty. Solardyń arasynda birinshi oryn aldym.
Qazaqtyń dańqty batyr uldarynyń biri Baýyrjan Momyshuly «Otan úshin otqa tús – kúımeısiń» degen eken. Keń-baıtaq jerimizdi batyr babalarymyz jaýǵa bermeı aman alyp qalyp, bizge amanat etti. Meniń shekarashy retindegi mindetim – el shearasyn qyraǵylyqpen, abyroımen kúzetý», - deıdi Arnur Ámirǵalıev.
