Shekaradan zańsyz munaı kirgizbek bolǵandar ustaldy
ASTANA. QazAqparat - Qazaqstan-Reseı shekarasyndaǵy «Aqsaı» (Batys Qazaqstan oblysy) ótkizý-baqylaý beketiniń baqylaýshylary Reseı Federatsııasynyń azamatyn ustady, dep habarlaıdy QR UQK baspasóz qyzmeti.
Atalǵan azamat «MAN» avtokóligimen Reseı Federatsııasynan bizdiń elimizge zańsyz jolmen 28 tonna shıki munaıdy alyp ótýge tyrysqany anyqtaldy.
Teksere kelgende onyń qolynda atalǵan júkke sáıkes keletin qujat bolmaı shyqty.
Ustalǵan azamat júgimen birge Batys Qazaqstan oblysynyń qarjy polıtsııasyna berildi.
«Jańajol» shekaralyq baqylaý beketiniń baqylaýshylary (Soltústik Qazaqstan oblysy) «Skanııa» avtokóligimen 40 000 lıtr peshke jaǵatyn suıyq otyndy zańsyz jolmen bizdiń elimizden Reseıge ótkizbek bolǵan 50 jastaǵy Reseı Federatsııasynyń azamatyn ustady.
Teksere kelgende mashınadaǵy benzın janarmaıynyń (odan da qymbat janarmaı bolýy múmkin) qujattary peshke jaǵatyn otyn retinde toltyrylǵandyǵy anyqtaldy.
Saraptama júrgizý úshin ustalǵan júk Qarjy polıtsııasynyń Soltústik Qazaqstan oblysy boıynsha departamentine berildi.
Ustalǵan azamat QR Qylmystyq kodeksiniń 183-1 tarmaǵy boıynsha qylmystyq jazaǵa tartylýy múmkin (úlken kólemdegi munaı ónimderiniń alynǵan jerinen dáleledeıtin qujattarsyz tasymaldaý, satyp alý jáne saqtaý).
