Shekaradan zańsyz shyǵarylǵan mal qaı elderge satylyp jatyr – UQK jaýaby

ASTANA. KAZINFORM – Ulttyq qaýipsizdik komıtetiniń Shekara qyzmeti dırektorynyń orynbasary Tóleýjan Júnisov ońtústiktegi shekaradan zańsyz shyǵarylatyn maldyń qaı elderge satylatynyn aıtty.

- Qyrǵyzstanda mal baǵasy bizdikimen birdeı bolsa, Ózbekstanda 30 paıyz qymbat. Tirideı mal eksportyna shekteý qoıylǵanda kontrafaktilik jolmen shyǵarý kóbeıedi. Biraq bul shekaradan ótken maldyń bári Ózbekstanǵa ketip jatyr degen sóz emes. Ári qaraı Tájikstanǵa, Aýǵanstanǵa, Pákistanǵa aparady. Ol elderde baǵa aıyrmashylyǵy eki esege deıin barady, - deıdi general-maıor Májilistegi dóńgelek ústelden keıin.

Shekara qyzmetiniń ókili álemdegi túrli áskerı qaqtyǵystar drondardyń qaýipsizdik maqsattaǵy múmkindikterin pash etkenin, muny Ulttyq qaýipsizdik komıteti de nazarǵa alǵanyn aıtady.

- Bizde shekara kúzetin jetildirý baǵytynda keshendi jospar bar. Ol jospardy iske asyrý úshin 470 mlrd teńge bólingen. Onyń ishinde drondar satyp alý máselesi de bar. Biraq onyń sanyn, qarjylandyrý kózin ashyp aıtýǵa haqym joq. Qupııa málimet bolyp sanalady.

Jalpy drondy qoldanysqa engizgennen beri kómegin jaqsy kórip jatyrmyz. Byltyr shekaradan maldy kontrafaktilik jolmen alyp shyǵarýdyń 47 faktisin ashtyq. Nátıjesinde 5 myń maldy alyp qaldyq. Onyń jartysy iri qara, jartysy usaq mal.

Mysaly, bir joly dronnyń kómegimen Jambyl oblysyndaǵy shekaradan 200 qoıdy áketý áreketiniń joly kesildi, - deıdi ol.

Tóleýjan Júnisov dron satyp alýmen qatar sarbazdardy oqytý júrip jatqanyn aıtady.

- Shekara qyzmetinde dronmen jumys isteıtin sarbazdardy oqytyp jatyrmyz. Kelisimshartpen kelgen qyzmetkerdi úsh aıǵa jiberip, oqytamyz. Qazir shtatta drondar bar. Onyń da sanyn aıta almaımyn. Negizinen qumdy, taýly tustarǵa tartyp otyrmyz. Kóbi Jambyl, jáne Túrkistan oblystarynyń aýmaǵyndaǵy shekara beketterine berilgen. Óıtkeni sol jaqta mal kontrafaktisi bar.

Jańaǵy aıtqan keshendi josparda ár shekara zastavasynda keminde bir dron bolý kerek degen ındıkator qoıylǵan. Ony iske asyrý memlekettiń qarjylyq múmkindigine baılanysty. Óıtkeni shekaralyq aýmaqtyń jer bederine baılanysty dronnyń ár túrin qoldaný kerek. Al drondardyń baǵasy paıdalaný maqsatyna, áskerı múmkindikterine baılanysty qymbattaı beredi, - dedi UQK ókili.

Atalǵan dóńgelek ústelde Májilis depýtaty Amanjol Áltaı «Qaladan — aýylǵa» atty baǵdarlamany qolǵa alýdy usyndy.