Shekaradan esirtki alyp ótpek bolǵandardyń bári ıisshil ıtti aldaı almaı, qolǵa tústi
ASTANA. QazAqparat - Ońtústik óńirlik basqarmasyna qarasty «Merke» tekserip-ótkizý beketiniń «Sypataı batyr avto» kóliktik-shekaralyq tekserý bólimshesiniń shekarashylary Qyrǵyz Respýblıkasynan bizdiń elge kelýshiler zalynda «Kaıta» atty qyzmettik ıttiń kómegimen jylý batareıalarynda polıetılen paketke salynyp tyǵylǵan «Gashısh» esirtkisin tapty. Kólemi asa kóp emes, 3-4 gr. ǵana.
Іzge túsken ıt esirtkiniń ıesi retinde 1970 jyly týǵan «Ashyraly» esimdi qyrǵyzstan azamatyn kórsetti. Ádette ıt qatelespeıdi. Aıǵaqty zat kúdiktimen birge ishki ister qyzmetkerlerine tapsyryldy, anyq-qanyǵyna solar jetetin bolady.
Qyzmettik ıtter ózderiniń esirtki tasymalynyń jolyn kesýde taptyrmas kómekshi ekendigin kúndelikti dáleldeýde. Mysaly, Petropavl shekara otrıadynyń «Qyzyljar avto» bólimshesinde 8 qarasha kúni túngi saǵat 01.30-da «Mıkı» atty qyzmettik ıt «Petropavlovsk-Tıýmen» (Qazaqstannan Reseıge qaraı) baǵytyna bet alǵan «Setra» jolaýshylar avtobýsyn tekserý kezinde № 37-38 oryndyqtardyń jastyqshalaryna tyǵylǵan qaǵaz túıinshekti taýyp, artynsha onyń «marıhýana» esirtkisi ekendigi anyqtaldy. Bul da kóp emes, bar-joǵy 4-5 gramm, bireýdiń jolda «ermek» qylýǵa alyp shyqqan esirtkisi bolar. Kólemi az bolsa da zardaby kóp bolýy da ǵajap emes edi.
Dál osy bólimsheniń shekarashylary sol kúni tańerteńgi saǵat 09.00-de «Temırtaý-Tıýmen» baǵytymen ketip bara jatqan jolaýshylar avtobýsyndaǵy 1966 jyly týǵan «Sergeı» esimdi QR azamatynyń kúrteshesiniń qaltasynan 2-3 gr. «marıhýana» esirtkisin tapty.
Bir saǵattan keıin (saǵat 10.00) taǵy da sol bekettiń shekarashylary «Temırtaý-Tıýmen» baǵytymen ketip bara jatqan taǵy bir avtobýstan 1-2 gr «marıhýana» esirtkisin alyp júrgendigi úshin qazaqstandyq «Andreı» esimdi azamatty ustady. Joǵaryda atalǵan eki júrginshi de aıǵaqty zattarymen birge Qyzyljar aýdandyq ishki ister bólimine jóneltildi.
Ońtústik óńirlik basqarmasynyń Qordaı shekara orıadyna qarasty «Qordaı avto» bólimshesinde 8 qarasha kúni qyzmettik ıt 1962 jyly týǵan «Turahan» esimdi qazaqstandyq azamatty (Qyrǵyzstannan-Qazaqstanǵa kele jatqan) esirtki tasymaldaýshy retinde kórsetti. Tekserý bólmesine alyp bara jatqan shekarashylar atalmysh azamattyń áldebir nárseni qaltasynan alyp laqtyryp jibergendigin kózderi shalyp qaldy. Laqtyrylǵan túıinshek tabylyp, gashısh esirtkisi ekendigi anyqtaldy (2,26 gr), dep habarlaıdy QR UQK ShQ baspasóz qyzmeti.
