Shekaradan 800 lıtr alkogol ónimderin zańsyz ótkizbek bolǵandar ustaldy

QOSTANAI. QazAqparat - Qazaqstanǵa 800 lıtrge jýyq zańsyz alkogol ónimderin alyp ótpek bolǵandar qolǵa tústi, dep habarlaıdy QazAqparat.

Oqıǵa 8 shildede Qarabalyq aýdanynyń «Qaıraq» avtokólik ótkizý beketinde bolǵan. Oblystyq memlekettik kirister departamentiniń qyzmetkerleri shuǵyl is-sharalar barysynda Reseıden Qazaqstanǵa alkogol ónimderin alyp ótpek bolǵandardy ustady.

«Quramynda spırti bar shyqqan tegi belgisiz suıyqtyq 4 jáne 5 lıtrlik plastıkalyq ydystarǵa quıylǵan, ruqsat qujattary (alkogol ónimderin saqtaý jáne bólshek saýdalaý lıtsenzııasy, ilespe qujattary) joq. Barlyǵy quny 1,5 mln teńge bolatyn, jalpy kólemi 792 lıtr 183 ydys kontrafakt alyndy», - delingen vedomstvonyń baspasóz qyzmeti taratqan habarlamada.

Kúdiktilerge qatysty Qazaqstan Respýblıkasynyń «Ákimshilik quqyq buzýshylyqtar týraly» Kodeksiniń 463-babynyń 1-tarmaǵy boıynsha ákimshilik is toltyrylyp, sotqa jiberildi.