Shekaradan 78 qundyz tonyn alyp ótpek bolǵandar ustaldy
ASTANA. QazAqparat - Almaty oblystyq memlekettik kirister departamentiniń «Altynkól» keden beketine qarasty «Qorǵas» shekara mańy halyqaralyq yntymaqtastyǵy ortalyǵy baqylaý-ótkizý pýnktinde 78 qundyz tonyn alyp ótken azamatsha ustaldy, dep habarlaıdy QazAqparat tilshisi.
QR Qarjy mınıstrligi Memlekettik kirister komıtetiniń málimetinshe, kezekti kedendik tekserý barysynda kedenshiler men ekonomıkalyq qylmysqa qarsy kúres jáne shekara qyzmetkerlerine Janar Aýbakırova esimdi azamatshanyń «qundyz tońdar ótkizýi múmkin» degen aqparat kelip túsken. Aldyn ala syrttaı baqylaý barysynda onyń sybaılastarynyń kimder ekendigi de mólshermen belgili bolǵan. Olardyń alǵa qoıǵan jospary - qundyz tondardy bir adam ǵana emes, birneshe adamǵa bólip berý arqyly ótkizý. Sondyqtan da sezik týdyryp almas úshin birlesken top múshelerin kedendik tekserýden birtindep ótkizýge týra kelgen. Sóıtip, sybaılastar kedendik tekserýden ótip bolǵan soń, qundyz tońdardy bir jerge jınaǵan sátte ǵana kedenshiler men shekarashylardyń jáne ekonomıkalyq qylmysqa qarsy kúres qyzmetkerleriniń birlese áreket etýiniń nátıjesinde qolǵa tústi. Ustalǵan 78 dana qundyz tońdardyń kedendik quny 12 mıllıon 750 myń teńgeni quraıdy.
Qazirgi ýaqytta atalǵan oqıǵa boıynsha Qazaqstan Respýblıkasy Qylmystyq kodeksiniń 234 babynyń 1 tarmaǵy (ekonomıkalyq kontrabanda) boıynsha qylmystyq is qozǵaý máselesi qarastyrylýda.
