Shekaradan 2,8 mlrd teńgeden asa shetel valıýtasyn alyp ótpek bolǵandar jaýapqa tartyldy

ASTANA. KAZINFORM — UQK Shekara qyzmeti 2025 jylǵy naýryz aıyndaǵy is-qımyl nátıjeleri týraly qorytyndyny jarııa etti.

UQK Shekara qyzmeti Memlekettik shekarany kúzetý men qorǵaýdy qamtamasyz etý aıasynda 2025 jylǵy naýryzda quzyrly organdarmen ózara árekettese otyryp, shekara keńistiginde QR zańnamasyn buzǵan 3 429 adam, onyń ishinde 2 995 sheteldik azamat jaýapqa tartyldy.

— Memlekettik shekara arqyly zańsyz ótýdiń 1 248 faktisiniń aldyn alyndy, onyń ishinde: 27 fakti — esirtki zattary, onyń ishinde kólemi — 750 lıtr prekýrsorlar; 76 fakti — qarýlar men oq-dáriler; 656 fakti — jalpy somasy 14,5 mln teńgeden asatyn janar-jaǵarmaı materıaldary (54 000 lıtrden astam); 731 fakti — jalpy somasy 3,1 mlrd teńgeden asatyn halyq tutynatyn taýarlar; 157 fakti — jalpy somasy 2,8 mlrd teńgeden astam shetel valıýtasy, — delingen vedomstvo habarlamasynda.

Kaspıı jaǵalaýyndaǵy aımaqta ekologııalyq qaýipsizdikti qamtamasyz etý maqsatynda kórsetilgen kezeńde sý aıdynynda brakonerliktiń 20 faktisiniń joly kesildi.

— Tabıǵı mekendeý ortasyna Qyzyl kitapqa engizilgen bekire tuqymdas balyqtardyń 89 danasy (508 kg) jáne 7 bas kaspıı ıtbalyǵy jiberildi. Zańsyz balyq aýlaý quraldary tárkilendi. Onyń ishinde: 10 júzý quraly; 22,9 km tordy quraıtyn brakonerlik aýlaý quraldary. Aldyn alynǵan zalaldyń somasy 205 mln teńgeni quraıdy, — dep túıindedi UQK baspasóz qyzmeti.

Bul faktiler boıynsha materıaldar buzýshylardy jaýapkershilikke tartý úshin quqyq qorǵaý jáne sot organdaryna jiberildi. 

Osydan buryn jyl basynan UQK polıtsııa jáne prokýratýra organdarymen birlesip 12 avtomat, 41 tapansha, 75 myltyq, 36 granata jáne ártúrli kalıbrdegi 1 603 oq-dári tárkilegeni habarlandy.