Shekaradan 20 tonna syrany zańsyz asyrmaq bolǵandar ustaldy

ASTANA. QazAqparat - Pavlodar oblysyndaǵy «Naıza» shekaralyq avtomobıl ótkizý pýnktinde 20 tonna syrany zańsyz áketý áreketiniń joly kesildi. Bul týraly QR QM Memlekettik kirister komıtetinen habarlady.

Alkogol ónimderin zańsyz áketýdiń atalǵan faktisi 15 qyrkúıekte Pavlodar oblysy boıynsha Memlekettik kirister departamenti qyzmetkerleriniń kóleńkeli ekonomıkaǵa qarsy jumysy sheńberinde anyqtalǵan.

Nátıjesinde jalpy kólemi 20 tonna bolatyn «syra» alkogol ónimi bar avtokólik ustaldy. Qujattardy qaraý jáne tekserý barysynda alkogol óniminiń tıisti qujattary bolmaǵany anyqtaldy. Bul — «Etıl spırti men alkogol óniminiń óndirilýin jáne aınalymyn memlekettik retteý týraly» Qazaqstan Respýblıkasynyń Zańyn buzý.

Qazirgi ýaqytta QR ÁQBtK-niń 463-babyna sáıkes memlekettik kirister organdarynyń qyzmetkerlerimen Ýspen aýdandyq sotyna protsessýaldyq sheshim qabyldaý úshin materıaldar joldandy.