Shekaradaǵy sym qorshaý arqyly: Serik Kúdebaevtyń elden qalaı qashqany belgili boldy

ASTANA. QazAqparat – Eks-general Serik Kúdebaevqa qatysty qylmystyq is qaralǵan Almaty oblysy Kegen aýdandyq soty onyń elden qalaı jáne qashan qashyp ketkeni týraly tyń derekterdi jarııalady, dep habarlaıdy QazAqparat tilshisi.

«Aıyptalýshy Serik Kúdebaev bıyl 15 naýryzda shamamen saǵat 4:30-da qylmystyq josparǵa sáıkes, Kegen aýdanyndaǵy tikendi symnan jasalǵan shekara qorshaýyn kóterip, ótkizý pýnktinen tys aýmaq arqyly Qazaqstan-Qyrǵyzstan shekarasyn zańsyz kesip ótken. Osylaısha, K. Manas áýejaıy arqyly Túrkııaǵa ushyp, jazadan jaltarmaq boldy. Ustalǵannan keıin ol Qazaqstanǵa ekstradıtsııalandy», - delingen Almaty oblysy Kegen aýdandyq sotynyń baspasóz qyzmeti taratqan habarlamada.

Aıta keteıik, keshe eks-general Serik Kúdebaevqa osy qylmysy úshin sot úkimi shyqty.

Buǵan deıin sottalýshy protsestik kelisim jasaǵysy keletinin aıtyp ótinish bildirgen.

Esterińizge sala keteıik, Serik Kúdebaev 28 sáýir kúni 10 jylǵa sottalǵan bolatyn.

Oǵan laýazymdyq ókilettigin asyra paıdalaný jáne azaptaý baptary boıynsha aıyp taǵyldy.

Ol bıylǵy 30 naýryz kúngi sot otyrysyna kelmedi. Sondyqtan ony sotqa májbúrli túrde jetkizý jóninde qaýly shyqty.

Artynsha generaldyń elden qashyp ketkeni belgili bolyp, Taldyqorǵan qalalyq soty Serik Kúdebaevqa halyqaralyq izdeý jarııalady.

27 sáýirde Serik Kúdebaev Túrkııada ustalyp, elge jetkizildi.

Almaty oblystyq polıtsııa departamentiniń burynǵy basshysy Serik Kúdebaev qańtar oqıǵasy boıynsha kúdikti dep tanylǵan edi.