Shekaradaǵy ótkizý beketterinde elektrondy kezek júıesi engizilmek

ASTANA. QazAqparat – Búginnen bastap Qytaımen shekaradaǵy «Dostyq» avtomobıl ótkizý pýnktinde elektrondy kezek júıesi iske qosylady. Ortalyq kommýnıkatsııalar qyzmetinde bolǵan brıfıng barysynda Memlekettik kirister komıteti tóraǵasynyń orynbasary Baqytjan Slıamov osylaı málimdedi, dep habarlaıdy QazAqparat tilshisi.

«Memlekettik kirister komıteti Ulttyq qaýipsizdik komıtetiniń Shekara qyzmetimen birlesip, 2022 jylǵy 23 qarashadan bastap Qytaımen shekarada «Dostyq» avtomobıl ótkizý pýnktinde elektrondy kezektiń avtomattandyrylǵan júıesin pılottyq iske qosý josparlanyp otyr. Ol úshin memlekettik organdar Qazaqstannan shyqqan kezde avtomobıl kólik quraldaryn ótkizýdi uıymdastyrýdyń ýaqytsha shemasyn bekitti. Aǵymdaǵy jyldyń 23 qarashasynan bastap munda «Qoldau.kz» platformasynyń nemese «Sargoruqsat» mobıldi qosymshasynyń avtomattandyrylǵan elektrondyq kezek júıesi paıdalanylatyn bolady», - dep atap ótti ol.

Onyń málimdeýinshe, elektrondy kezek júıesin qurýdyń maqsaty – kólik quraldarynyń, júkter men taýarlardyń ótkizý pýnktine kirý kezektiligin qalyptastyrý jáne bul protsestiń ashyqtyǵyn qamtamasyz etý.

«Baǵdarlamany qoldaný óte ońaı. Máselen, júrgizýshi portal nemese mobıldi qosymshaǵa tirkelip, keıin jol júrý úshin bos kún men ýaqytty tańdaıdy. Artynsha oǵan óz kezegi týraly SMS-habarlama joldanady», - deıdi Baqytjan Slıamov.

Komıtet dereginshe, atalǵan ilki jobanyń qorytyndysy negizinde memlekettik shekaranyń barlyq perımetri boıynsha elektrondy kezek júıesi kezeń-kezeńimen engiziledi.