Shekaradaǵy qazaqstandyqtar otandyq telearnalardy tsıfrlyq sapada tamashalaıdy
«Bıyl qazaq televızııasynyń qurylǵanyna 60 jyldan asa ýaqyt ótti. Dál osyndaı tarıhı kezeńde biz otandyq tsıfrlyq efırlik teleradıohabarlaryn taratýdy keshendi túrde qolǵa aldyq. Qazir jan-jaqty jumystar júrgizip jatyrmyz. Bul aýqymdy ári mańyzdy shara ekenin atap ótkim keledi», - dep toqtaldy mınıstr.
Osy rette ol tsıfrlyq habar taratý qalyń kórermenge ásirese aýdan, qala ortalyqtarynan shalǵaıda ornalasqan aýyldaǵy aǵaıynǵa qandaı paıda ákeletindigin atap ótti.
«Birinshiden, bul efırdiń jáne dybystyń joǵary sapasyn, ekinshiden, telearnalar paketiniń ulǵaıýyn qamtamasyz etedi. Memleketimiz osy jumysty qolǵa alǵan ýaqytta búkil eldiń aýmaǵyn tsıfrlyq deńgeıge kóshirý josparynyń júzege asatynyna senimsizdikpen qaraǵan adamdar da boldy. Óıtkeni Qazaqstannyń jer kólemi óte aýqymdy ekeni belgili. Halyq ta tyǵyz ornalaspaǵan. Shekaradaǵy aýyldar men alys eldi mekenderde turatyn halyqtyń 100 paıyzyn tsıfrlyq habar taratýǵa aýystyrý alynbaıtyn qamal sııaqty kóringeni ras. Alaıda Elbasynyń tikeleı tapsyrmasy men saıası erik-jigeriniń nátıjesinde qarjylyq máseleler de sheshilip, telekommýnıkatsııa salasyndaǵy ınfraqurylymdy damytýǵa dańǵyl jol ashyldy», - dedi Dáýren Abaev.
Máselen, mınıstrdiń dereginshe, kórshi Qyrǵyzstan tsıfrlyq habar taratýǵa tolyq aýysty. Olarǵa 100-den asa radıo televızııalyq stansa jetkilikti boldy. Al bizdiń memleketti tolyq qamtamasyz etý úshin 827 stansa qajet.
«Biz ol jumysty az ýaqytta aıaqtaýdy josparlap otyrmyz. Tsıfrlyq habar taratý tehnıkalyq máseleni sheshýmen ǵana shektelmeıdi. Bul eń aldymen úlken ıdeologııalyq sheshim deýge tolyq negiz bar. Ózderińizdiń de esterińizde bolar, biz osy aýqymdy jumysty bastaǵan ýaqytta shekaralas aýmaqta ornalasqan aýyldarda otandyq bir-eki telearna ǵana kórsetetin. Biz osy standartqa tolyq aýyssaq qazaqstandyqtar oblys ortalyqtary deńgeıinde 30-ǵa jýyq telearnany, aýyl jáne aýdan ortalyqtarynda 15-ke jýyq otandyq telearnany tsıfrlyq sapada tamashalaı alady. ıAǵnı otandyq arnalar arqyly halyq ózderine qajetti aqparat pen baǵdarlamalarǵa qol jetkizedi. Otandyq pakette «jańalyq» pen «balalarǵa arnalǵan», «mádenıet» pen «kıno», «sport» sııaqty túrli arnalar bolady. Bul memlekettik aqparattyq saıasatty nyǵaıtýǵa da óz yqpalyn tıgizedi», - dedi mınıstr.
