Shekaradaǵy avtokólik ótkizý beketterinde shekarashylar men keden qyzmetkerleri ǵana qalady - Qarjy vıtse-mınıstri

ASTANA. 21 qańtar. QazAqparat - Qazaqstannyń memlekettik shekarasyndaǵy avtokólik ótkizý beketterinde tek eki ǵana organ - shekarashylar men keden qyzmetkerleri ǵana qalady. Bul týraly búgin Májiliste «QR keıbir zańnamalyq aktilerine Keden odaǵynyń kedendik shekarasy arqyly avtomobıl ótkizý pýnktterinde veterınarııalyq-sanıtarııalyq baqylaý jáne ósimdikter karantıni boıynsha baqylaý fýnktsııalaryn keden organdaryna berý máselesi boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

Eske sala ketsek, qoldanystaǵy zańnamaǵa sáıkes, Qazaqstan Respýblıkasynyń memlekettik shekarasyn kesip ótetin barlyq tulǵalar men kólik quraldary shekaralyq, kedendik, sanıtarlyq, veterınarlyq, fıtosanıtarlyq jáne kóliktik baqylaý túrlerinen ótkiziledi.

Bul rette QR Qarjy vıtse-mınıstri Ardaq Teńgebaev Qazaqstannyń 1982 jyldyń 21 qazanynda Jenevada jasalǵan Shekarada júkterge baqylaý júrgizýdiń sharttaryn kelisý týraly Halyqaralyq konventsııaǵa qatysýshy bolyp tabylatynyn atap ótedi. Onyń aıtýynsha, atalmysh Konventsııa keden qyzmetine baqylaýdyń basqa túrlerin qosý múmkindigin qarastyrady. Vıtse-mınıstrdiń sózine qaraǵanda, 2011 jyldyń 1 shildesinen keden organdaryna sanıtarlyq-karantındik baqylaý, al 2013 jyldyń 27 qańtarynan keden organdaryna kóliktik baqylaý fýnktsııasy berilgen.

«Al usynylyp otyrǵan ózgerister boıynsha keden organdaryna veterınarlyq-sanıtarlyq jáne fıtosanıtarlyq baqylaý qyzmetterin berý qarastyrylyp otyr. Bul fýnktsııalar qazirgi ýaqytta tıisti memlekettik organdardyń qyzmetkerlerimen atqarylyp kele jatqany belgili. Al osy zań jobasy qabyldansa, Qazaqstannyń memlekettik shekarasyndaǵy avtokólik ótkizý beketterinde tek 2 memlekettik organ qalady, olar - shekarashylar men keden qyzmetkerleri. Bul shekara arqyly kólik quraldary men júkterdiń irkilissiz ótýine septigin tıgizedi. Osy arqyly memleket halyqaralyq saýdany damytýǵa járdemdesý mindetin atqarady», - deıdi A. Teńgebaev.