Shekaradaǵy aýyldar nazardan tys ári qoldaýsyz qaldy – depýtat

NUR-SULTAN. QazAqparat – Senat depýtaty Olga Býlavkına shekaradaǵy aýyldar máselesin kóterip, Úkimet basshysynyń atyna depýtattyq saýal joldady, dep habarlaıdy QazAqparat tilshisi.

Senatordyń aıtýynsha, basqa eldermen shekaralas aýyldarda 1,5 mıllıonǵa jýyq adam turady.

«Halqy 200 adamǵa jetpeıtin 1300-ge tarta aýyl memleket nazarynan tys ári qoldaýsyz qaldy. Tek keıingi úsh jyldyń ózinde «Nurly jer» baǵdarlamasy boıynsha 10 mıllıon sharshy metrden astam turǵyn úı salyndy. Alaıda qarajatty bólý kezinde basty nazar Nur-Sultan, Almaty qalalaryna, oblys jáne aýdan ortalyqtaryna aýdaryldy», - dedi Olga Býlavkına Senat otyrysynda.

Depýtattyń aıtýynsha, tipti turǵyn úı salynyp qoıǵan aýyldardaǵy jer ýchaskeleri máselesi de rettelmegen. Sondaı-aq senator jeke turǵyn úı salý máselesi de ol aýyldarda kúrdeli ekenin jetkizdi.

Onyń aıtýynsha, halqy 5 myń adamnan turatyn aýyldar sý jáne elektr jelilerimen qamtamasyz etilýi kerek. Alaıda keıbir aýdanda oǵan bóler qarajat joq. Munyń saldary azamattardyń jer ýchaskesin alý quqyǵyn shektep otyr.

Shekaralas aýdandarda qajetti materıaldyq jáne áleýmettik ortany qalyptastyrý úshin ne istelip jatyr? Shekaralas aýdandarǵa grant bólý nemese olardy qandaı bir memlekettik turǵyda qoldaý sharalary qarastyryp jatyr ma? Salyq jaǵynan ol jaqtaǵy turǵyndarǵa jeńildik berile me? Olga Býlavkına Úkimet basshysyna osy saýaldardy qoıyp, belgilengen merzim ishinde jaýap berýdi ótindi.

Sondaı-aq depýtat atalǵan aýdandarda Jumyspen qamtý men bıznestiń jol kartasy durys júzege asyrylmaı jatqanyna nazar aýdarýǵa shaqyrdy.