Shekaradaǵy atystan soń Ońtústik Koreıa «bes qarýyn» saılaı bastady
SEÝL. QazAqparat - Ońtústik Koreıanyń áskerı basshylyǵy Soltústik Koreıa tarapynan bolýy múmkin qaýip-qaterlerdiń kúsheıýine baılanysty eki elder arasyndaǵy batys teńiz shekarasyna qosymsha aýyr qarý jetkizdi. Bul týraly búgin Áskerı Shtab basshylarynyń birikken komıtetinen habarlady.
Eske sala keteıik, ótken aptada qos Koreıa áskerıleri Soltústik demarkatsııalyq aýmaqta jáne teńiz shekarasynda bir-birine oq jaýdyrǵan bolatyn. Sary teńizde ornalasqan atalmysh teńiz shekarasy Soltústik jáne Ońtústik Koreıa memleketteriniń arasyndaǵy eń daýly aýmaq bolyp tabylady jáne 1999, 2002 men 2009 jyldary eń qantógisti qaqtyǵystar osy jerde oryn alǵan. «Soltústikten kenet shabýyldarǵa jáne Sary teńizdegi birqatar araldardy basyp alýǵa tótep berý úshin sol óńirge qosymsha Chiron Man zymyrandary men brondy tehnıka jetkizildi», - delingen Áskerı Shtab basshylarynyń birikken komıteti (Joint Chiefs of Staff) taratqan habarlamada. Sondaı-aq 155 mm jáne 105 mıllımetrlik artıllerııa jaqyn mańǵa ornalastyrylǵan. «Áskerıler eger Soltústik Koreıa tarapynan tutqıyldan shabýyly jasalatyn jaǵdaıda qolǵa alynatyn sharalardyń birneshe nusqasyn daıyndaýda», - dep jazady JCS. Sonymen qatar baıandamada atap kórsetilgenindeı, Seýl tarapy áskerı jasaqtyń tolyq daıyndyǵyn qamtamasyz etip otyr. Óz kezeginde saıasatkerler shekarada oryn alǵan mundaı oqys jaǵdaıdyń oryn alýy eki memlekettiń jylyp kele jatqan qarym-qatynasyna balta shabýy yqtımal dep baǵa bere bastady. Buǵan deıin Inchhonda eki memlekettiń laýazymdy tulǵalary kezdesip, qarasha aıynyń basynda taǵy bir mańyzdy saıası talqylaýlar ótkizý jónindegi ýaǵdalastyq jasasqan, alaıda Phenıan tarapy osy atystardan keıin bul kelisim oryndalmaýy múmkin ekendigin aıtýda.
