Shekaradaǵy uzynsonar kezek: Antıkor kóshpeli monıtorıng ótkizdi

AQTÓBE. KAZINFORM – Aqtóbe oblysyndaǵy «Jaısań» shekara beketinde áli de uzynsonar kezek. Sybaılas jemqorlyqqa qarsy qyzmettiń Aqtóbe oblysy boıynsha departamenti kóshpeli monıtorıng ótkizdi.

Sybaılas jemqorlyqqa qarsy qyzmettiń Aqtóbe oblysy boıynsha departament basshysy Talǵat Bashev Mártók aýdanyndaǵy «Jaısań» ótkizý pýnktine bardy. Kóshpeli monıtorıngke ákimdik, kólik prokýratýrasy, memlekettik kirister organdary, UQKD shekara qyzmeti jáne ishki ister organdarynyń ókilderi qatysty.

Sybaılas jemqorlyqqa qarsy qyzmettiń oblys boıynsha departament basshysy Talǵat Bashev azamattar men bıznes ókilderiniń, onyń ishinde shetel azamattarynyń múddesine tikeleı áser etetin jaǵdaıdy shuǵyl sheshýdi usyndy. Birinshiden, jol jóndeý jumystary aıaqtalyp, ótkizý pýnktiniń ınfraqurylymy jańartylǵanǵa deıin elektrondy kezek júıesin ýaqytsha toqtata turý múmkindigin qarastyrý qajet. Onyń ornyna brondaýdyń ıkemdi tetigin engizý jáne elektrondy kezek júıesiniń jumys isteý tártibin jetildirý kerek. Ekinshiden, ótkizý beketiniń sanıtarlyq jaǵdaılaryn rettep, aqparattyq taqtalar jáne basqa da qajetti elementterdi iske qosý usynyldy. Úshinshiden, oblystyq polıtsııa departamentine qosymsha kúshterdi tartý arqyly «Jaısań» ótkizý beketinde quqyqtyq tártipti qamtamasyz etý usynyldy,- dep habarlady Sybaılas jemqorlyqqa qarsy qyzmettiń Aqtóbe oblysy boıynsha departamenttiń baspasóz qyzmeti.

Eske salsaq, oblystyq kásipkerler palatasyna bir aptada 200-den astam shaǵym túsken. Shekaradan ótetin júrgizýshilerdiń máselesin sheshý úshin jıyn ótti.