Shekaradaǵy uzynsonar kezek: Aqtóbe ákimdigi qandaı kelisimge keldi
AQTÓBE. KAZINFORM — «Jaısań» shekara beketindegi kútý aımaǵy bıyl iske qosylady. Joba jyl sońyna deıin tolyq aıaqtalýy tıis. Kazinform saýalyna Aqtóbe oblysy ákiminiń baspasóz qyzmeti jaýap berdi.
Aqtóbe-Orynbor oblystary arasyndaǵy «Jaısań» shekara beketindegi kólik keptelisi máselesiniń týyndaǵanyna eki jylǵa jýyqtady. Sodan beri shekarashylar, keden qyzmeti, salyq salasynyń organdary men jergilikti atqarýshy bılik ókilderi jınalyp, talqyǵa salyp keledi. Bul suraq kórshiles elder arasyndaǵy kezdesýde de aıtyldy.
— Aqtóbe oblysy tarapynan shekara mańyndaǵy ınfraqurylymǵa túsetin kólik júktemesin azaıtý jáne «Jaısań» avtomobıl ótkizý pýnktiniń ótkizý qabiletin arttyrý maqsatynda tıisti memlekettik organdarmen jáne Reseı tarapymen birlesip keshendi jumystar júrgizilip jatyr. Qazirgi ýaqytta RF shekaralyq ótkelde joldy keńeıtý sharalaryn iske asyrýdy qolǵa aldy. Bul másele Aqtóbe oblysynyń ákimi Ashat Shaharovtyń Orynbor oblysyna jumys sapary barysynda da kóterilip, jan-jaqty talqylandy. Kezdesýde taraptar ınfraqurylymdyq sheshimderdi jedeldetýge jáne shekaradaǵy kezekterdi azaıtýǵa ózara múddeli ekenin rastady. Sonymen qatar, «Karanar-Trans» JShS-i byltyr júk kólikteriniń qozǵalysyn retteý maqsatynda «Jaısań» halyqaralyq avtomobıl ótkizý pýnktinde «CarGoRuqsat» elektrondyq kezek kútý aımaǵy jobasyn iske asyrýdy bastady. Aýmaǵy 4 gektardy quraıtyn nysannyń birinshi kezeńin bıyl qyrkúıek aıyna deıin paıdalanýǵa berý josparlanyp otyr, — dep habarlady Aqtóbe oblysy ákiminiń baspasóz qyzmeti.
Kútý aımaǵynda júrgizýshilerge arnalǵan servıstik nysandar, onyń ishinde qoǵamdyq tamaqtaný oryndary men qonaqúı kesheni bolady. Joba tolyqtaı 2027 jylǵa deıin aıaqtalady.
Buǵan deıin Kazinform agenttigi shekara túbinde ornalasqan Jaısań aýyly týraly jazdy. Munda 3 myńnan astam adam turady.
