Shekaradaǵy ótkizý pýnktteri jańartylady: Qazaqstan men Reseı «jol kartasyna» qol qoıdy
ASTANA. KAZINFORM — Qazaqstan men Reseı arasynda kólik salasyndaǵy yntymaqtastyq týraly qujattar qabyldandy, dep habarlaıdy Kólik mınıstrliginiń baspasóz qyzmeti.
Qazaqstan Respýblıkasynyń Prezıdenti Qasym-Jomart Toqaevtyń Reseı Federatsııasyna memlekettik sapary aıasynda kólik jáne logıstıka salalaryndaǵy eki el arasyndaǵy strategııalyq áriptestikti odan ári damytýǵa baǵyttalǵan birqatar ekijaqty qujattarǵa qol qoıyldy. Qazaqstan Respýblıkasy atynan qujattarǵa Kólik mınıstri Nurlan Saýranbaev qol qoıdy.
Negizgi kelisimder
1. Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy kólik qaýipsizdigin qamtamasyz etý salasyndaǵy ózara is-qımyl týraly kelisim.
Qujat kólik qaýipsizdigin qamtamasyz etý salasyndaǵy ekijaqty yntymaqtastyqty damytýǵa baǵyttalǵan. Aldaǵy ýaqytta taraptar zańsyz aralasý áreketteriniń aldyn alý, jedel aqparat almasý jáne qaýip-qater týyndaǵan jaǵdaıda ýákiletti organdardyń is-qımyldaryn úılestirý boıynsha birlesip jumys isteıtin bolady.
2. Reseı Federatsııasynyń Úkimeti men Qazaqstan Respýblıkasynyń Úkimeti arasyndaǵy úshinshi elderge eksportqa arnalǵan júkterdiń tranzıttik temirjol tasymaldary men aýystyryp tıeý salasyndaǵy yntymaqtastyqty uıymdastyrý týraly kelisim.
Atalǵan kelisimdi iske asyrý eki eldiń tranzıttik áleýetin nyǵaıtýǵa, logıstıkalyq tizbekterdi ońtaılandyrýǵa jáne halyqaralyq júk tasymaldarynyń tıimdiligin arttyrýǵa jańa múmkindikter ashady.
Budan bólek, shekara mańy ınfraqurylymyn jańǵyrtý maqsatynda vedomstvoaralyq qujatqa — Reseı men Qazaqstan memlekettik shekarasyndaǵy avtomobıl ótkizý pýnktterin damytý jónindegi is-sharalar josparyna («Jol kartasyna») qol qoıyldy.
Onyń iske asyrylýy ótkizý pýnktteriniń ótkizý qabiletin arttyrýǵa, shekaradan ótý ýaqytyn qysqartýǵa jáne syrtqy ekonomıkalyq qyzmetke qatysýshylar úshin qolaıly jaǵdaılar jasaýǵa múmkindik beredi.
— Qol qoıylǵan kelisimder praktıkalyq mańyzǵa ıe jáne Qazaqstan men Reseı arasyndaǵy kólik salasyndaǵy strategııalyq áriptestikti tereńdetýge baǵyttalǵan. Olardy iske asyrý turaqty logıstıkalyq baǵyttardyń qalyptasýyna, tranzıttik dálizderdiń damýyna jáne Qazaqstan men Reseıdiń Eýrazııa keńistigindegi negizgi kólik toraptary retindegi ornyn nyǵaıtýǵa yqpal etetin bolady, — dep atap ótti vedomstvo.
Osyǵan deıin Qazaqstan men Reseı memleketaralyq temirjol túıisý pýnktterin jańǵyrtatyny habarlandy.