Shekaradaǵy keptelis: Reseı tarapy «Saǵarshyn» beketiniń ótkizý jolaǵyn arttyratyn boldy
AQTÓBE. KAZINFORM — Bıyl jobalaý jumystary bastalyp, eki jyl ishinde qurylys júredi. Qazir 2 jolaqty bolsa, ony 10-ǵa jetkizedi.
Aqtóbe oblysynyń kásipkerler palatasy taǵy da Kásipkerlerdiń quqyqtaryn qorǵaý jónindegi keńestiń otyrysyn ótkizdi. Munda «Jaısań» shekara beketindegi keptelisti azaıtý, joıý jumystarynyń naqty sheshimi týraly aıtyldy. Kásipkerler palatasy Orynbor oblysyndaǵy Kásipkerlerdiń quqyqtaryn qorǵaý jónindegi ýákil Vıktor Korshýnovqa júgingen. Ózara is-qımyl nátıjesinde Qazaqstan-Reseı shekarasyndaǵy ótkizý pýnktterin damytý jónindegi Jol kartasy engizilgenin bildi.
— Reseı tarapynyń aqparatyna súıensek, 2026 jyly «Saǵarshyn» ótkizý pýnktin modernızatsııalaý jumysy uıymdastyrylady. Al 2028 jylǵa qaraı qozǵalys jolaqtarynyń sanyn onǵa deıin keńeıtý josparlanǵan. Eki bekettiń qýattylyǵy birdeı bolsa kezek bolmaıdy, halyqaralyq tranzıttegi kedergi joıylady. Sonymen birge ishki protsedýralardy ońtaılandyrý boıynsha da jumystar júrgizilip jatyr. Ótken Keńesten keıin Aqtóbe oblysynyń máslıhaty QR Parlamenti Senatyna, Qarjy mınıstrligine, Aýyl sharýashylyǵy mınıstrligine jáne UQK Shekkara qyzmetine shekaranyń ózinde akkredıttelgen fıtosanıtarlyq zerthanalaryn ashý týraly usynys joldady. Bul bastama qoldaý tapty. Ásirese tez buzylatyn taýarlardy ótkizý jeńeldeıdi, — dep habarlady Aqtóbe oblysynyń kásipkerler palatasynyń baspasóz qyzmeti.
Kásipkerler palatasy «Jaısań» shekara beketindegi monıtorıngti jalǵastyrady.
Buǵan deıin habarlaǵanymyzdaı, Aqtóbede shekara beketindegi uzyn-sonar kezektiń negizgi sebepteri aıtyldy. «Jaısań» shekara beketinde 8, al Reseı tarapyndaǵy «Saǵyrshyn» shekara beketinde 2 ótkizý jolaǵy bar. Bul teńsizdikten uzyn-sonar kezek túziledi.