Shekaradaǵy 6 avtomobıl ótkizý pýnktinde qurylys-montajdaý jumystary júrgiziledi

ASTANA. KAZINFORM — 2030 jylǵa deıin 36 avtomobıl ótkizý pýnkti qaıta jańartylady. Bul týraly «QazAvtoJol» UK» AQ basqarma tóraǵasy Darhan Imanashev aıtty.

— Taǵy da bir mańyzdy baǵyttardyń biri — shekaradaǵy avtomobıl ótkizý pýnktteriniń ınfraqurylymyn damytý. Búgingi tańda memlekettik shekara boıynda 52 ótkizý pýnkti jumys isteıdi. Onyń ishinde Eýrazııa ekonomıkalyq qaýymdastyǵy elderi arasynda 38 pýnkt, syrtqy shekarada 14 pýnkt bar. Bıyl Besaǵash, Qarasý, Syrym, Álimbet, Jańa Jol jáne Qosaq ótkizý pýnktterinde qurylys-montajdaý jumystary josparlanǵan. Qarjylandyrý kólemi — 51 mlrd teńgeni quraıdy. 2030 jylǵa deıingi uzaqmerzimdi josparǵa sáıkes 36 avtomobıl ótkizý pýnktin qaıta jańartý kózdelgen, — dedi ol Ortalyq kommýnıkatsııalar qyzmetindegi brıfıngte.

Sonymen qatar ol jol boıyndaǵy qyzmet kórsetý nysandaryn damytý máselesine toqtaldy.

— Respýblıkalyq mańyzy bar avtojoldar jelisinde 1 500-ǵa jýyq jol boıyndaǵy qyzmet kórsetý nysandary ornalasqan. 2025 jyly jeke ınvestıtsııalar esebinen qosymsha 36 jańa nysan ashý josparlanýda. Onyń ishinde: 22 janarmaı quıý stantsııasy (JQS) jáne 14 kafe. Jol paıdalanýshylarǵa qolaıly jaǵdaı jasaý maqsatynda týrıstik nysandarǵa aparatyn baǵyttarǵa 37 jańa sanıtarlyq torap ornatý josparlanǵan. Nátıjesinde respýblıkalyq avtojoldar boıyndaǵy sanıtarlyq toraptardyń sany 181 birlikke jetpek, — dedi Darhan Imanashev.

Buǵan deıin Qyrǵyz Respýblıkasy men Qazaqstan shekarasynda toǵyzynshy arnaıy ótkizý beketi salynatynyn jazǵan edik.