Shekarada júkterdi uzaq ustaýǵa bolmaıdy - Baqytjan Saǵyntaev

ASTANA. QazAqparat - Úkimet basshysy Baqytjan Saǵyntaev shekara arqyly júkterdi tezdetip ótkizýdi tapsyrdy. Áıtpese, tranzıttik kompanııalar úshin júkterdi Reseı arqyly tasymaldaǵan tıimdi bolyp otyr, dep xabarlaıdy QazAqparat tilshisi.

«Ótkende biz konsýltanttarmen keńestik. Olar aıtady, Qytaı-Qazaqstan shekarasyna qaraǵanda, Qytaı-Reseı shekarasynda júkterdi tez ótkizedi. Ol jaqta jyldam isteıdi. Alaıda Asqar Uzaqbaıuly (Úkimet basshysynyń orynbasary - avt.) olaı emes deıdi. Al Dúnıejúzi bankiniń sarapshylary qaǵaz júzinde jasalǵan jumysqa qaramaıdy. Olar júkterdi ótkizý jyldamdyǵyn baǵalaıdy», - dedi Saǵyntaev Mınıstrler kabınetiniń búgingi otyrysynda.

Úkimet basshysynyń aıtýynsha, Reseımen salystyrǵanda, Qazaqstan shekarasy arqyly júkterdi jetkizý ýaqyty bes kúnge jyldam bolsa da, shekarada ketken ýaqytpen utylýymyz ábden múmkin. Osy oraıda Premer-Mınıstr qarjy mınıstrligine júkterdi tekserý salasyna ozyq texnologııalardy tezdetip engizýdi tapsyrdy. «Men texnıkalyq máselelerdiń bar ekenin túsinemin. Júkterdi bir jerden ekinshi jerge qaıta tıeý kerek jáne taǵysyn taǵy. Degenmen, qoldan kelgenshe júkterdi barynsha tez ótkizý qajet», - dep atap kórsetti Baqytjan Ábdiruly.