Shekarada tonnalaǵan kontrabandalyq júkter ustaldy
ASTANA. 27 qarasha. QazAqparat - Qazaqstandyq shekarashylar Reseıge zańsyz jolmen tonnalaǵan júkterdi alyp ótpek bolǵan elimizdiń úsh azamatyn ustady. Bul týraly QR UQK ShQ baspasóz qyzmetinen habarlady.
Naqtyraq aıtqanda, Aqtóbe shekara otrıadyna qarasty «Álimbet avto» ótkizý-baqylaý beketiniń shekara jasaǵy 40 jastaǵy Qazaqstan azamatyn ustady. Ustalǵan azamat «Gaz» avtokóligimen 750 lıtr bolatyn «Krıstall» araǵyn Reseıge zańsyz alyp ótpek bolǵanda ustaldy. Teksere kelgende jalpy quny jarty mıllıon teńge bolatyn alkogol ónimderiniń qujattary bolmaı shyqty.
Osy sekildi, 28 tonna pııaz artqan 56 jastaǵy Qazaqstan azamaty Qazaqstan-Reseı shekarasyn qujatsyz ótpek bolǵan jerinde kidirýine týra keldi. Atalǵan júktiń jolyn «Jaısań avto» beketiniń shekarashylary bógedi.
Sonymen birge Oral shekara otrıadyna qarasty «Shaǵan avto» ótkizý-baqylaý beketiniń shekarashylary Reseı Federatsııasyna «Gazel» avtokóligimen ketip bara jatqan 29 jastaǵy qazaqstandyqty ustady. Tekserý kezinde atalǵan kóliktiń ishinen qujaty joq bir tonnaǵa jýyq teńiz shaıandary tabyldy. Atalǵan júk Oral aýdanaralyq balyq ınspektsııasyna berildi.
Barlyq atalǵan derekter boıynsha quqyq qorǵaý organdary habarlandyryldy. Tergeý amaldary júrgizilýde.
