Shekarada taǵy da uzynsonar kezek: Aqtóbede polıtsııa baqylaýdy kúsheıtti

AQTÓBE. KAZINFORM – «Jaısań» shekara beketinde 50 jeńil, 100-den astam júk kóligi tur. Polıtsııa qazir kólikterdiń júrisin baqylap, quqyqtyq keńes berip jatyr.

Qazaqstan-Reseı shekarasyndaǵy bekette taǵy da kezek kóbeıdi. Maýsymda bastalǵan jaǵdaı áli retke kelmedi. Shilde aıynyń alǵashqy kúni de kezek tolastamady. 

— «Jaısań» ótkizý pýnktinde 100-den astam júk kóliginiń jınalǵany baıqalady. Atalǵan jaǵdaıdyń týyndaýyna osy ýchaskede engizilgen jańa talaptar sebep boldy. Qoǵamdyq tártip pen jol qozǵalysy qaýipsizdigin qamtamasyz etý maqsatynda polıtsııa qyzmetkerleri táýlik boıy kezekshilik atqaryp jatyr. Olar qoǵamdyq tártipti saqtaý, kólik aǵynyn retteý jumystaryn júrgizip, shekaradan ótý erejelerine qatysty quqyqtyq keńes te beredi. Júrgizýshilerden sabyr saqtaýdy, belgilengen tártip pen polıtsııa qyzmetkerleriniń nusqaýlaryn qatań saqtaýdy suraımyz. Atalǵan ýaqyt aralyǵynda qoǵamdyq tártipti buzý faktileri tirkelgen joq, — dedi Mártók aýdandyq PD bastyǵy Nurlan Taýshanbaev. 

Eske salsaq, mamyr aıynyń sońynda oblystyq kásipkerler palatasyna bir aptada 200-den astam shaǵym túsken. Shekaradan ótetin júrgizýshilerdiń máselesin sheshý úshin jıyn ótti.  Sybaılas jemqorlyqqa qarsy qyzmettiń Aqtóbe oblysy boıynsha departamenti kóshpeli monıtorıng ótkizdi. Al Aqtóbe oblystyq memlekettik kirister departamenti «Jaısań» shekara beketindegi jol qurylysy ýaqytsha toqtatylyp, júrgizýshiler elektrondy talon alýǵa mashyqtanǵanyn aıtty. Arada bir aı ótkenimen jaǵdaı ózgermeı tur.