Shekarada munaı ónimderiniń zańsyz tasymalyna tosqaýyl kúsheıtiledi
ASTANA. KAZINFORM — Oljas Bektenov munaı ónimderi naryǵyndaǵy ahýal boıynsha keńes ótkizip, birqatar tapsyrma berdi, dep habarlaıdy Úkimettiń baspasóz qyzmeti.
Premer-mınıstr Oljas Bektenov jaýapty mınıstrlikter men quqyq qorǵaý organdary basshylyǵynyń qatysýymen syrtqy faktorlardyń yqpalyn eskere otyryp, munaı ónimderi naryǵyndaǵy qazirgi jaǵdaıy boıynsha keńes ótkizdi.
Jıynda energetıka mınıstri Erlan Aqkenjenovtiń baıandamasy tyńdaldy.
Búginde Qazaqstannyń munaı óńdeý zaýyttary ishki naryqtyń qajettilikterin tolyq qamtamasyz ete otyryp, shtattyq rejımde jumys istep tur. Elimizdegi benzın, dızel jáne avıatsııalyq otyn qory 1 mln tonnadan asady, bul tutynýshylardyń qazirgi suranysyn tolyq óteýge múmkindik beredi. Munaı ónimderimen avtojanarmaı quıý stansalary, aýyl sharýashylyǵy taýaryn óndirýshiler jáne otandyq áýe tasymaldaýshylaryna basymdyqpen qamtamasyz etilýde. Janar-jaǵarmaı materıaldarynyń tapshylyǵy baıqalmaıdy. Óndiris kólemine, jóneltýge jáne qorlarǵa turaqty monıtorıng júrgizilip jatyr.
Keńes barysynda munaı ónimderin zańsyz áketýdiń aldyn alý sharalaryna erekshe nazar aýdaryldy. Qazirgi ýaqytta Qazaqstan aýmaǵynan avtomobıl kóligimen munaı ónimderiniń jekelegen túrlerin jáne temirjol kóligimen jeńil dıstıllıattardy shyǵarýǵa tyıym salý týraly Energetıka mınıstrliginiń buıryǵy qoldanysta. Sonymen qatar avtokólikterdiń memlekettik shekarany táýligine bir retten artyq kesip ótýine shekteý engizilgen.
Sondaı-aq ishki ister mınıstri Erjan Sádenovtiń, UQK tóraǵasynyń orynbasary — Shekara qyzmetiniń dırektory Erlan Aldajumanovtyń jáne Qarjylyq monıtorıng agenttigi tóraǵasynyń orynbasary Qaırat Bıjanovtyń baıandamalary tyńdaldy.
Premer-mınıstr Oljas Bektenov ishki munaı ónimderi naryǵynyń turaqtylyǵyn qamtamasyz etý strategııalyq mańyzǵa ıe ekenin atap ótti.
Keńes qorytyndysy boıynsha birqatar tapsyrma berildi:
— janar-jaǵarmaı tapshylyǵyna jol bermeý jáne el qajettiligin úzdiksiz qamtamasyz etý maqsatynda shekaradaǵy baqylaýdy kúsheıtip, barlyq qajetti sharalar qabyldaý;
— UQK Shekara qyzmetine Qarjy mınıstrligimen jáne Qarjylyq monıtorıng agenttigimen birlesip, memlekettik shekarada baqylaýdy kúsheıtý, munaı ónimderin zańsyz tasymaldaýdyń barlyq shemasyn anyqtap, jolyn kesý;
— Energetıka mınıstrligine munaı ónimderin óndirý, qorlar jáne tutyný teńgerimine turaqty monıtorıng júrgizýdi jáne qajet bolǵan jaǵdaıda qosymsha sharalar qabyldaý jóninde jedel usynystar engizýdi qamtamasyz etý tapsyryldy.
Buǵan deıin Oljas Bektenov vandalızmge qarsy baqylaýdy kúsheıtýdi tapsyrǵan edi.
