Shekarada esirtki tasymaldaý kúdigimen ánshi NAVAI ustaldy
ASTANA. KAZINFORM — Ánshi esirtki kontrabandasymen aınalyspaq boldy degen kúdikke ilingen. Ol ýaqytsha ustaý ızolıatoryna qamaldy, dep habarlaıdy Kazinform tilshisi.
Polıtsııanyń málimetinshe, sahnada NAVAI laqap atymen tanymal sheteldik azamat 13 qazanda Qazaqstanǵa kirmek bolǵan kezde Qordaı shekara beketinde toqtatylǵan. Ony polıtsııa jáne Ulttyq qaýipsizdik komıtetiniń (UQK) Shekara qyzmetiniń qyzmetkerleri birlesip ustaǵan.
Polıtsııanyń málimetinshe, ártis mingen kólikti tintý kezinde esirtki tabylyp, tárkilengen. Reperdiń naqty ne jáne qansha mólsherde alyp júrgeni ázirge qupııa bolyp otyr.
Esirtki kontrabandasymen aınalyspaq boldy degen kúdikpen qylmystyq is qozǵaldy. Sotqa deıingi tergeý amaldary júrip jatyr.
Polıtsııa Qylmystyq-protsessýaldyq kodekstiń 201-babyna silteme jasap, qosymsha málimetterdi jarııalamaıtynyn málimdedi.
Buǵan deıin Aqtóbede reper Qarakesektiń ustalǵany týraly habarlaǵan bolatynbyz. Polıtsııanyń málimetinshe, oryndaýshyny tintý kezinde sıntetıkalyq esirtki salynǵan paket tabylǵan.
Sonymen qatar, Astanada Telegram arqyly esirtki satqan top músheleri sottaldy.
