Shekarada esirtkimen 61 jastaǵy qart ustaldy
ASTANA. QazAqparat - Qazaqstan men Reseı shekarasynda úsh kılogramǵa jýyq geroındy jasyryn alyp ótpek bolǵan azamat ustaldy. Bul týraly QR UQK ShQ baspasóz qyzmetinen habarlady.
Naqtyraq aıtsaq, «Soltústik» óńirlik shekara basqarmasyna qarasty «Aýyl» (avtomobıldi) shekaralyq-baqylaý bólimshesiniń baqylaýshylary UQK Shyǵys Qazaqstan oblysy boıynsha departamentiniń qyzmetkerlerimen birlese otyryp, keshendi jedel-izdestirý sharalaryn ótkizdi. Onyń barysynda Qazaqstannan Reseı Federatsııasyna esirtkilik zat ótkizbek bolǵan 61 jastaǵy reseılik azamat ustaldy.
Jan-jaqty oılastyrylyp, kásibı turǵyda pysyqtalǵan is-qımyldyń nátıjesinde «Deıa» atty ıttiń kómegimen Semeı qalasynan reseıdiń Rýbtsovsk qalasyna ketip bara jatqan «BMV» avtomashınasyn qaraý kezinde 2 kılogramm 800 gramm geroın tabyldy.
Esirtki mashınanyń janarmaı bagyna jasyrylǵan bolyp shyqty. Poroshoktyń túsine uqsaıtyn esirkilik zat 7 plastıkalyq qutyǵa salynypty.
Atalǵan derek boıynsha tergeý amaldary júrgizilýde.
