Shekarada erte pisetin kókónisterge arnalǵan «jasyl dáliz» ashylady
ASTANA. KAZINFORM – Úkimette QR Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen áleýmettik mańyzy bar azyq-túlik taýarlary baǵasy men erte pisetin kókónisterdi jetkizýge qatysty máseleler qaraldy. Bul týraly Saýda jáne ıntegratsııa mınıstrligi málim etti.
QR saýda jáne ıntegratsııa birinshi vıtse-mınıstri Aıjan Bıjanovanyń málimetinshe, ótken aptada ÁMAT baǵasynyń ındeksi 0,4% boldy. Sıyr eti men kókónis baǵasy óskeni belgili bolyp otyr. Sondaı-aq kúrish pen jumyrtqa 0,3%, makaron ónimderi men qaraqumyq baǵasy 0,1% arzandady.
— Sıyr eti baǵasynyń qymbattaýyna júrgizilgen taldaý qorytyndysy boıynsha ónim jyl basynan 11,9%-ǵa qymbattaǵan. Osy ónim túrine baǵa ósimin tejeý maqsatynda syrtqy saýda saıasaty jáne Halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııa elden iri qara maldy áketýge úsh aıǵa ýaqytsha tyıym salý týraly sheshim qabyldady, — delingen habarlamada.
Aýyl sharýashylyǵy mınıstrliginiń málimetinshe, 2025 jylǵy 28 sáýirge 25,6 myń tonna erte pisetin kókónis jetkizýge kelisimsharttar jasaldy, bul 11,1 myń tonna kartop, 4,7 myń tonna sábiz, 4,3 myń tonna pııaz jáne 5,4 myń tonna qyryqqabat.
Ońtústik óńirler ákimdikteriniń aqparaty boıynsha, bıylǵy maýsymda erte pisetin kókónisterdiń ónimi mol bolady dep kútilip otyr. Ónimniń negizgi kólemi Túrkistan oblysyna tıesili. Boljamǵa sáıkes, kartop kólemi 216,6 myń tonna, sábiz — 41,5 myń tonna, pııaz — 87,5 myń tonna, qyryqqabat — 228,9 myń tonna deńgeıinde kútilýde. Túrkistan oblysynda 17,5 myń tonna qyryqqabat jınalyp, onyń 1,3 myń tonnasy eksporttaldy. Sonymen qatar Jetisý, Almaty jáne Qyzylorda oblystarynda forvardtyq kelisimsharttar aıasynda erte pisken aq qyryqqabatty jetkizý bastaldy. Іshki naryqty ónimmen toltyrý maqsatynda jyl basynan beri 80 myń tonna kartop pen 30 myń tonna qyryqqabat ımporttaldy.
Jıynda tasymal kezinde ımporttyq ónimniń baǵasy qalaı ózgeretini qaraldy. Shekarada kidiristerdiń aldyn alý úshin kókónisterge maýsym aıynyń sońyna deıin «jasyl dáliz» engizý týraly sheshim qabyldandy. Bul ónim jetkizýdi jedeldetýge, logıstıkalyq shyǵyndardy azaıtýǵa, nátıjesinde ishki naryqtaǵy baǵany turaqtandyrýǵa múmkindik beredi.
Buǵan deıin habarlanǵandaı, elimizde «Jasyl dáliz» júıesi men tsıfrlyq platforma iske qosyldy.