Shekarada aqshasynan aıyrylǵan jesir ananyń isin Bas prokýratýra baqylaýǵa aldy
Aıta keteıik, E. Saırov atajurtqa oralamyn dep kelgen jalǵyzilikti anaǵa qoldaý kórsetýde. Osy máselege qatysty 23 mamyr kúni arnaıy baspasóz máslıhatyn da ótkizgen bolatyn.
«Óskemende sot otyrysy ótedi. Advokattar arqyly keshe QR Bas prokýratýrasyna osy tergeýshi organdardyń, onyń ishinde keden qyzmeti men shekarashylardyń zańsyz áreketteri jóninde aryz-shaǵym kirgizdik. Endi ary qaraı Bas prokýratýranyń ókilderimen jumys isteıtin bolamyz. Óıtkeni bul jerde shekarashylar men keden qyzmetkerleri zańdy belden basyp jibergen. Biz advokattarmen birigip, qujattardyń barlyǵyn Bas prokýratýraǵa kirgizdik. Ary qaraı endi qadaǵalap otyramyz», - dedi belgili qoǵam belsendisi Erlan Saırov «QazAqparat» tilshisine bergen suhbatynda.
Eske sala ketsek, budan buryn BAQ betterinde Shyǵys Qazaqstan oblysyna qarasty Zaısan aýdanynyń «Maıqapshaǵaı» keden beketinen Qazaqstanǵa Qytaıdan kóship kele jatqan jesir ananyń 59 900 AQSh dollaryn shekarashylar tárkilep alǵandyǵy habarlanǵan bolatyn. Kúıeýinen erte jesir qalyp, eki balasyn jalǵyz ósirip kelgen Gúljan Máýithan Qytaıdaǵy ózine tıesili úıi men bar dúnıe-múlkin satyp, ol aqshaǵa Astana qalasynan úı alýdy kózdegen eken.