Shekarada 636 mln teńgeden asatyn deklaratsııalanbaǵan qarajat anyqtaldy
ASTANA. KAZINFORM — Ulttyq Qaýipsizdik komıteti zańsyz valıýta alyp ótýge qatysty 38 árekettiń jolyn kesti.
UQK Shekara qyzmeti aqsha qarajatyn elden zańsyz alyp shyǵýǵa jol bermeý baǵytynda turaqty túrde jumys júrgizip keledi.
Tek 30 maýsym men 7 shilde aralyǵynda memlekettik shekara arqyly ótkizý pýnktterinde osyndaı 38 áreket anyqtaldy.
— Nátıjesinde jalpy somasy 636 mıllıon teńgeden astam deklaratsııalanbaǵan valıýta anyqtaldy. Jekelengen jaǵdaılardyń birinde, UQK ShQ Jambyl oblysy boıynsha departamentiniń «Qordaı» avtokóliktik shekaralyq baqylaý bóliminde shetel azamatynyń júgin tekserý barysynda 350 000 AQSh dollary (170 037 000 teńge) anyqtaldy. Atalǵan fakti boıynsha materıaldar protsessýaldyq sheshim qabyldaý úshin quzyretti organdarǵa joldandy, — delingen habarlamada.
UQK Shekara qyzmeti Qazaqstan Respýblıkasynyń zańnamasyna sáıkes respýblıka aýmaǵynan (10 myń AQSh dollarynan balamasynan asatyn) sommadaǵy qolma-qol aqsha qarajatyn shyǵarýǵa tyıym salynatynyn eske salady.
Buǵan deıin UQK shekarada 6,9 mlrd teńgeniń deklaratsııalanbaǵan valıýtasyn alyp ótpek bolǵandardy toqtatqany belgili boldy.
