Shekara máselelerin retteý Ortalyq Azııanyń damýyna berik negiz qalady — Rahmon
ASTANA. KAZINFORM — Shekara máselelerin tolyq retteý Tájikstan úshin tarıhı oqıǵalardyń biri boldy. Bul týraly búgin el parlamentine joldaǵan jyl saıynǵy Joldaýynda Tájikstan Respýblıkasynyń prezıdenti Emomalı Rahmon aıtty, dep habarlaıdy Kazinform agenttiginiń menshikti tilshisi.
— 2025 jyl tájik halqy men táýelsiz Tájikstan memleketi úshin mańyzdy jetistikter men oqıǵalarǵa toly taǵy bir tarıhı jyl boldy, — dedi Emomalı Rahmon.
Ol 2025 jylǵy saıası oqıǵalardyń eń mańyzdysy retinde Medjlısı Namoıandagon depýtattarynyń, jergilikti halyq depýtattary jınalystarynyń jáne Tájikstan Respýblıkasy Joǵarǵy Medjlısiniń múshelerin saılaýdy atady.
— Taǵy bir tarıhı oqıǵa — Tájikstan men Qyrǵyzstan arasyndaǵy júz jyldan astam ýaqyt boıy sheshilmeı kelgen shekara máselelerin tolyq retteý, ıaǵnı memlekettik shekarany delımıtatsııalaý týraly kelisimge qol qoıylýy, — dep atap ótti E. Rahmon.
Prezıdenttiń aıtýynsha, memleket basshylary sonymen qatar Tájikstan, Qyrǵyzstan jáne Ózbekstan arasyndaǵy úsh eldiń memlekettik shekarasynyń qosylý núktesi týraly kelisimge jáne Hýdjand deklaratsııasyna qol qoıǵan. Bul qujattar Ortalyq Azııa aımaǵyn damytýǵa berik quqyqtyq negiz berip, ózara tıimdi yntymaqtastyqty jalǵastyrýǵa múmkindik beredi.
Eske salsaq, bıyl naýryzda Tájikstan prezıdentiniń Qyrǵyzstanǵa memlekettik sapary kezinde Emomalı Rahmon men Sadyr Japarov memlekettik shekara týraly kelisimge qol qoıǵan edi.
Sonymen qatar Qyrǵyzstan men Tájikstan sý máseleleri boıynsha yntymaqtastyqty nyǵaıtyp otyr.